“Яҡындарымдың ышанысы көслөрәк итә”

“Башҡортостан” гәзитенең “Бәйләнештә”ге төркөмөндә Урындағы үҙидара органдары хеҙмәткәрҙәре көнө айҡанлы ойошторолған “Иң яҡшы ауыл биләмәһе хакимиәте башлығы” конкурсында ҡатнашыусылар менән таныштырыуҙы дауам итәбеҙ. Сираттағы конкурсантыбыҙ – Ҡалтасы районының Кәлтәй ауыл советы ауыл биләмәһе башлығы Ульяна Евгеньевна Батыршина. Ульяна Евгеньевна 2009 йылда Кәлтәй ауыл хакимиәтенә йәштәр менән эшләү буйынса белгес булып килә. Тырыш, маҡсатлы хеҙмәткәрҙе 2011 йылда эштәр идарасыһы итеп тәғәйенләйҙәр. 2020 йылдың сентябрендә уны хакимиәт башлығы итеп һайлайҙар. - Хакимиәт башлығы булып эшләү – еңел хеҙмәт түгел, ул бик күп көс, фиҙакәрлек талап итә. Эш күп яҡлы. Бында үҙеңә ваҡыт та ҡалмай тиерлек. Тәүлектең һәр сәғәтендә, минутында бәйләнештә булырға тура килә, үҙ биләмәңдәге хәлдәр торошон белеп торорға тейешһең, сөнки халыҡтың именлеге, хәүефһеҙлеге өсөн яуаплыһың, - ти Ульяна Евгеньевна. Үҙ эшмәкәрлегендә кешеләр менән уртаҡ тел табыу, уларҙы тыңлай белеү, проблемалары менән яңғыҙ ҡалдырмау ни тиклем мөһим икәнен яҡшы аңлай ул һәм, ниндәй генә ауыр, ҡатмарлы хәлдәр килеп тыумаһын, аңлап ҡарарға, изге күңелле булып ҡалырға тырыша. “Һәр хәл ителгән һорау, йырып сығылған мәшәҡәт, кешеләргә күрһәтелгән ярҙам күңелгә дәрт өҫтәй”, - ти хакимиәт башлығы. Кәлтәй ауыл биләмәһенә ҡараған ауылдарҙа башҡарылған эштәр күп. 2023 йылда “Беҙҙең ауыл” проектына ярашлы Оло Кәлтәй ауылында яңы обелиск төҙөлгән. Йыл дауамында биләмәләге ауылдар урамдарында иҫке яҡтыртыу лампаларын яңыһына алмаштырыу эше алып барыла. Үрге һәм Түбәнге Тыхтем ауылдарында зыяраттың кәртәһе яңыртылған, Оло Кәлтәйҙәр был эшкә быйыл тотонмаҡсы. “Транснефть” йәмғиәтенең ярҙамы менән Оло Кәлтәйҙә ике быуа барлыҡҡа килгән, был эш янғынға ҡаршы көрәш сиктәрендә лә бик кәрәкле башланғыс булып тора. Ауыл биләмәһендә йәшәгән халыҡ “Атайсал” проектында ла әүҙем ҡатнаша. Мәҫәлән, Үрге Тыхтемда шишмә буйы төҙөкләндерелгән. “Тәүлек әйләнәһенә тиерлек эшләүегеҙгә ғаиләгеҙ нисек ҡарай?” тигән һорауҙы ла бирҙек ауыл хакимиәте башлығына. - Ғаиләм – ышаныслы тылым. Атай-әсәйем, тормош иптәшем һәм балаларым миңә һәр саҡ ярҙам итеп тора. Бөтә башланғыстарымда ошо яҡын кешеләремә, туғандарыма таянам. Улар миңә ышана һәм яҡшыраҡ булырға, яңынан-яңы һөҙөмтәләргә өлгәшергә дәртләндерә. Улар менән үҙемде көслөрәк, яҡлаулыраҡ тоям, - тип яуапланы Ульяна Батыршина. Беҙ уға тормошта ла, артабанғы эшмәкәрлегендә лә һәм, әлбиттә, беҙҙең конкурста ла уңыштар теләйбеҙ! Фотолар: Ульяна Батыршинаның шәхси альбомынан.