Тикшереүҙәрҙең икенсеһе айырыуса тулҡынландырғыс...

“Һаулыҡ һаҡлау” милли проектының тәүге звеноны яңыртыу программаһына ярашлы, Шишмә үҙәк район дауаханаһына яңы ультратауыш аппараты алынды. Ҡағиҙә булараҡ, йөклөлөктө күҙәткәндә планда өс ультратауыш тикшереүе үткәреү ҡаралған. Беренсе триместрҙа тикшереү яралғының айырым тән өлөштәренең симметрияһын, плацента структураһын билдәләй, яралғы эргәһендәге һыу күләмен асыҡлай. Шулай уҡ өҙлөгөүҙәр хәүефен, бала үҫешендәге аномалияларҙы һәм айырым генетик сирҙәрҙе асыҡлай. Икенсе тикшереү тулҡынландырғыс: тап шунда әсәйҙәр баланың енесен белә. Өсөнсө тикшереү баланың дөйөм үҫешен күрһәтә, плацента торошон, ҡорһаҡта нисек ятыуын билдәләй. Был күрһәткестәрҙең барыһы ла мөһим. – Ошондай сифатлы ҡорамал ярҙамында пациенттарыбыҙҙың йөклөлөк барышын күҙәтеүебеҙ һөйөнөслө. Ул бик асыҡ күрһәтә. Яңы сканер менән эшләү уңайлы. Уның ярҙамында эш сифатын да, күләмен дә яҡшырта алабыҙ, - тине ультратауыш диагностикаһы табибы Лилиә Ишбулдина. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығының матбуғат хеҙмәте.