Ауылының киләсәге өсөн ысын күңелдән янғандар ғына был вазифала эшләй алалыр. Миәкә районынан конкурсантыбыҙ, Мәнәүезтамаҡ ауылы биләмәһе башлығы Рәшит Әнүәр улы Фәзуллин оҙаҡ йылдар Приют ҡасабаһында йәшәй, нефть тармағында хеҙмәт итә, сит илдә лә эш тәжрибәһе туплай. Хаҡлы ялға сыҡҡас, тыуған ауылы Мәнәүезтамаҡта төпләнә. Бында ял итергә тура килмәй уға. Тәүҙә ауыл советы депутаты була, һуңынан ауыл биләмәһе башлығы итеп һайлап ҡуялар. 2019 йылдан алып Рәшит Әнүәр улы ошо вазифала. Хәүефһеҙлек, төҙөкләндереү мәсьәләләренә төп иғтибарҙы йүнәлтә ул етәкселек эшмәкәрлегендә. Иң элек “Урындағы башланғыстарға булышлыҡ итеү” программаһына ярашлы яңы янғын һүндереү машинаһы алыуға өлгәшә. Республика, район, бағыусылар, халыҡ менән бергәләп өлгәшәләр был маҡсатҡа. Янғын һүндереү машинаһы дүрт ауылды хеҙмәтләндерә. Резервта тағы ла бер янғын һүндереү машинаһы төрлө хәлдәргә әҙер тора. Бынан тыш Мәнәүезтамаҡ ауылында өс урамға һыу менән һауыттар ҙа хәстәрләнгән. Улар өсөн яуаплы кешеләр билдәләнгән. Ҡышҡы осорҙа һыулы һауыттар йылы бокста һаҡлана. Төҙөк, матур ауылдар - халыҡтың тырышып донъя көтөүенең сағылышы. Мәнәүезтамаҡ ауыл биләмәһенә дүрт ауыл ҡараһа, уларҙың зыяраттарының барыһының да ҡоймалары яңыға алмаштырылған. Күпселегенә хужалыҡ әйберҙәре өсөн йорт та төҙөлгән, зыяратҡа илткән юлдар ҙа тигеҙләнгән. Ғөмүмән, юлдар торошо ла был төбәктә иғтибар үҙәгендә. Тәүге сиратта етәксе Мәнәүезтамаҡ, Сурай ауылдарында юлдарҙы ремонтлай. Бөгөн был эш Ихтисад ауылында дауам итә. Урамдарҙы яҡтыртыу тураһында ла онотмайҙар. Иҫке лампалар замансаға алмаштырыла. Бындай яҡтыртҡыстар күп сығым талап итмәй. Былтыр кәрәк урындарға 18 лампа ҡуйылһа, быйыл да был эш дауам итәсәк, ти ауыл биләмәһе башлығы. Ауылдарҙы төҙөкләүҙә “Урындағы башланғыстарға булышлыҡ итеү” программаһының ҙур ярҙам күрһәтеүен билдәләй Рәшит Әнүәр улы. Быйыл программаға ярашлы Мәнәүезтамаҡ ауылының Мәҙәниәт йортон ремонтлау ниәтләнә. Патриотик тәрбиә лә төп урында. Бөйөк Ватан һуғышы яугирҙәренә һәйкәлдәр ҡуйылған, Мәнәүезтамаҡ ауылында тыл хеҙмәтсәндәрен ҙурлап стела асылған. Бөгөн махсус хәрби операциялағы яугирҙәргә лә был төбәктә ныҡлы ярҙам ойошторолған. Шәм дә яһайҙар, миндектәр ҙә бәйләп оҙаталар, туҡмас та киҫәләр, үлән сәйҙәре әҙерләйҙәр. Был ҙур эштәрҙең барыһы да халыҡ менән бергәләп башҡарыла. Фото: Рәшит Фәзуллин архивынан.