Үткән аҙнала Кузьминовка ауылында йәшәгән таксист Юрий Силяевты Рәсәй Эске эштәр министрлығының Федоровка районы буйынса бүлексәһендә ведомствоның Рәхмәт хаты һәм иҫтәлекле бүләк менән наградланылар. Бүлексә начальнигы полиция подполковнигы Алексей Силяев таксисҡа гражданлыҡ позицияһы һәм юғары профессионаллеге өсөн рәхмәт белдерҙе, тип яҙа “Ашкадарские зори”. Билдәле булыуынса, ул көндә райондың байтаҡ халҡы мут кешеләрҙең һөжүменә эләккән. Граждандарҙың аҡсаһын ҡулдарына төшөрмәксе булып, аферистар ауыл кешеләренең башын әйләндерҙе, “һеҙҙең туғанығыҙ (улығыҙ) юл фажиғәһенә тарыны” тигән һылтау менән шылтыратып, күптәрҙе алдаштырырға тырышты. Һөҙөмтәлә районда йәшәгән 75-90 йәшлек ике ҡатын 100 мең һәм 250 мең һум аҡсаһынан ҡолаҡ ҡаҡты. Стационар телефон аша шылтыратҡан кеше ҡыҙының юл-транспорт аварияһына эләгеүе тураһында хәбәр итеп, язанан ҡотолоу өсөн байтаҡ суммала аҡса кәрәклеген белдерә. Шундай уҡ мутлашыу схемаһы буйынса икенсе ҡатын да ҡармаҡҡа эләгә. Юрий Силяевтың һиҙгерлеге арҡаһында хоҡуҡ һаҡлау хеҙмәткәрҙәренә енәйәтселәрҙе тоторға мөмкин була. Көндәрҙең береһендә Федоровка ауылы уртаһында ике егет таксистан уларҙы Күмертауға илтеүҙе һорай. Ир риза була, пассажирҙарҙы адрес буйынса илтә. Иртәгәһенә интернетта Стәрлебаш районында мутлашыу ваҡиғаһын ишетеп, видеоны ҡараһа, кафеға инеүсе ике егеттә таныш пассажирҙарҙы күрә. Шунда уҡ Стәрлебаш һәм Федоровка райондары полицияһы хеҙмәткәрҙәре менән бәйләнешкә инә. Хоҡуҡ һаҡлау органдары хеҙмәткәрҙәре тиҙ арала енәйәттә ғәйепләнеүсене ҡулға ала. Ул Күмертау ҡалаһында йәшәүсе 9-сы класс уҡыусыһы булып сыға. Үҫмер ғәйебен тулыһынса таный, ата-әсәһе зыянды өлөшләтә ҡаплаған. Тикшереү барышында уҡыусы Стәрлебаш районында тағы бер енәйәт ҡылыуын таный. Был осраҡта бер ҡатынды алдатып, уның 115 мең һум аҡсаһын алған. Был факттар буйынса өс енәйәт эше асыла. Полиция хеҙмәткәрҙәре граждандарға таныш булмаған телефон шылтыратыуҙарын алғанда һиҙгерлекте юғалтмаҫҡа, улар менән әңгәмәгә инмәҫкә ҡуша. Мутлыҡ осраҡтары менән осрашҡанда полицияға, Эске эштәр министрлығының Башҡортостан буйынса бүлексәһенең тәүлек әйләнәһенә эшләүсе дежурлыҡ бүлегенә шылтыратығыҙ: 8 (347)279-32-92. Елена Маганаева фотоһы. https://ashzori.ru/articles/politics/2024-04-12/razvivaemsya-dalshe-pochemu-putin-podderzhal-vydvizhenie-habirova-na-novyy-srok-3724162