Өфө районының Ҡыҙылъяр ауыл биләмәһе хакимиәте башлығы Дмитрий Рәшит улы Зөбәйеров “Башҡотостан” гәзитенең Урындағы үҙидара органдары хеҙмәткәрҙәре көнө айҡанлы ойошторған “Иң яҡшы ауыл биләмәһе хакимиәте башлығы” конкурсында ҡатнаша. Ҡыҙылъяр ауыл советы ауыл биләмәһе республикабыҙҙың баш ҡалаһы эргәһендә урынлашҡан, биләмәһе буйынса Өфө районының иң ҙур муниципаль берәмектәренең береһе – ул туғыҙ тораҡ пунктты үҙ эсенә ала, халҡы биш меңдән ашыу. Ауыл биләмәһенең административ үҙәге 400 йылдан ашыу тарихы булған Ҡыҙылъяр ауылында урынлашҡан. Биләмәһенең күпселек өлөшө ауыл хужалығы тауарҙарын етештереү менән шөғөлләнә, шулай уҡ бәләкәй һәм урта эшҡыуарлыҡ, сауҙа предприятиелары, төҙөлөш ойошмалары, нефть һәм газ сығарыу һәм ташыу ойошмалары бар. Күп һанлы тораҡ пункттар, әлбиттә, ауылдың үҫеш тиҙлеген бер аҙ ауырлаштыра, әммә төрлө дәүләт программаларында, грант конкурстарында ҡатнашыу һөҙөмтәһендә Ҡыҙылъяр ауыл биләмәһе үҫә, йылдам алға бара. – Бай тарих, мәҙәниәт һәм сәнғәт өлкәһендә халыҡ һәм ҡунаҡтар өсөн ҡыҙыҡһыныу тыуҙырған объекттар булыу сәбәпле, беҙҙең ауыл башлыса туризм: мәҙәни-тарихи, фольклор, этнографик ваҡиғалар, мәғариф һәм башҡа йүнәлештәр буйынса үҫешә, – ти Дмитрий Рәшит улы. Ауыл биләмәһе башлығы Дмитрий Зөбәйеров 2015 йылдан ауыл биләмәһе башлығы булып эшләй. Бынан алда уның иңендә төрлө кимәлдәге етәксе вазифаларҙа хеҙмәт юлы буйынса ҙур муниципаль тәжрибә ята. Ике юғары белем алған. Төрлө рәхмәт хаттары һәм маҡтау ҡағыҙҙары йәш етәксенең хеҙмәтенә яуаплы ҡарауы тураһында һөйләй. Үҙенең фекеренсә, халыҡтың әүҙемлеге, бюджет ойошмалары хеҙмәткәрҙәренән һәм етәкселәренән һәм бизнес вәкилдәренән торған команданың берлектәге эше һөҙөмтәһендә юғары күрһәткестәргә өлгәшәләр. Ауыл биләмәләре эшен ойошторғанда өлкән быуын тәжрибәһенә таяныу мөһим, тип иҫәпләй етәксе, шуға күрә ул ветерандарҙың, ауыл старосталарының фекеренә һәр саҡ ҡолаҡ һала. – Беҙ халыҡтың фекерен тыңларға, уларҙың теләктерән өҫкә еткерергә, кәрәк булғанда, беҙгә ышанып тапшырылған биләмәлә кешеләрҙең ихтыярын, өмөтөн яҡларға тейешбеҙ. Шулай уҡ ауыл биләмәһе советы эше башлыҡтың ҙур ярҙамсылары – депутаттар менән дә бергә алып барыла. Беҙҙең эшмәкәрлектә район хакимиәте һәм республика структуралары ҙур ярҙам күрһәтә, – тип фекерен уртаҡлашты Дмитрий Рәшит улы. Фото: Дмитрий Зөбәйеровтың эш альбомынан.