“Утты туҡтат” мәғлүмәт кампанияһы сиктәрендә Бөрө урмансылары янғынға ҡаршы әүҙем пропаганда алып бара. Мәғрифәтселек эшен “Экология” милли проектының “Урмандарҙы һаҡлау” федераль проекты маҡсаттарына ярашлы республиканың Урман хужалығы министрлығы ойошторҙо. Муниципалитеттың ауыл биләмәләрендәге урман хужалығы хеҙмәткәрҙәре халыҡ менән әңгәмәләр үткәрә, мәктәп уҡыусылары менән осраша һәм янғынға ҡаршы темаға мәғлүмәт буклеттары тарата. Участковый урмансы Олеся Баязитова Бөрө ҡалаһының 1-се мәктәбенә урман байлыҡтарын янғындан нисек һаҡлап ҡалырға кәрәклеге хаҡында һөйләне һәм “Урман һәм кеше” темаһына дәрес үткәрҙе. Участковый урмансы Ирек Мусин Борай ауылының 3-сө мәктәбе уҡыусыларына янғын хәүефһеҙлеге ҡағиҙәләрен иҫкә төшөрҙө һәм мәғлүмәт буклеттары таратты. Урмансы Илһам Хәкимов Абзай ауыл советында граждандар йыйылышында әңгәмә үткәрҙе. Дәүләт инспекторы Илшат Ғиззәтуллин Вострецов ауыл советы биләмәһендә "М-12" автомобиль юлын төҙөүселәр менән осрашты. Эшселәргә тағы бер тапҡыр янғын хәүефһеҙлеге ҡағиҙәләре тураһында иҫкә төшөрҙөләр. Дәүләт инспекторы Рим Ғилметдинов һәм участка урмансыһы Александр Яныбин Мишкә районының ауыл советтарында булды һәм халыҡ менән “Урман янғындары” темаһына әңгәмә үткәрҙе. Билдәле булыуынса, “Экология” (национальный проект “Экология”) милли проекты Рәсәй Президенты Владимир Путиндың май указы менән булдырылды. Фото: Урман хужалығы министрлығы.