Հայաստանն ամեն ինչ կանի, որպեսզի Ադրբեջանի կրակոցներն ունենան գնահատվելու հնարավորություն՝ նույնիսկ եվրադիտորդների մակարդակով և կհասնի նրան, որ կրակոցներ այլևս չլինեն, լրագրողներին ասել է Ազգային ժողովի պաշտպանության և անվտանգության հարցերի հանձնաժողովի նախագահ Անդրանիկ Քոչարյանը:
Նրա խոսքով՝ եվրոդիտորների արձանագրությունները կնպաստեն խաղաղության շուրջ տարվող աշխատանքներին։ «Երբ մենք ասում ենք խաղաղության պայմանագրի շուրջ աշխատանքները պետք է լինեն անխոչընդոտ, դա նշանակում է, որ այդ արձանագրումներն անելու են իրենց գործը։ Սեղանի շուրջ նստելուց մենք կասենք՝ գիտե՞ք ինչ, մենք գուցե տեխնիկական սարքերով չենք անում (վերահսկում-խմբ․) բայց ԵՄ-ն արդեն 209-ից ավել դիտորդներ ունի և կարող է ավելացնել»,- ասել է Քոչարյանը։
Քոչարյանը նշեց, որ վերջին կրակոցները Ադրբեջանի «հիստերիկ դրսևորումներն են» և նման դեպքերը կողմերին միայն հեռացնում են երկխոսությունից։ «Երևի այն կողմում կանգնածները որոշել են անկանոն կրակել։ Ընդամենը կրակոցներ են, որոնք պետք է արգելել նույն եվրոդիտորդների կողմից, որովհետև կրակոցն էլ պետք է չլինի։ Եթե կրակոց կա, սեղանի շուրջ նստածները չեն կարող իրենց աշխատանքի բուն փուլերին մոտենալ»,- ասել է նա։
Քոչարյանը հայտնեց, որ ռազմական լայնածավալ էսկալացիայի վտանգ այժմ չի տեսնում։ «Այ երբ որ կտեսնենք, կարծում եմ, որ էս հարցն էլ չի առաջանա, մենք կանցնենք մեր բնակավայրերի լիարժեք պաշտպանության»,- ասել է պատգամավորը։
Ապրիլի 5-ին ՀՀ ՊՆ-ն հայտնել էր Տավուշի և Գեղարքունիքի հայկական դիրքերի ուղղությամբ հակառակորդի կրակոցների մասին։ Ապրիլի 2-ին ՀՀ ՊՆ-ն հայտնել էր, որ ադրբեջանական ԶՈւ-ն կրակ է բացել Գեղարքունիքի մարզի Կութ և Սյունիքի մարզի Տեղ բնակավայրերում տեղակայված հայկական դիրքերի ուղղությամբ։