Гали хәзрәт Җиһаншин: «Мөселманнарны изге эшләр эшләргә чакырам»

10 апрель көнне бөтен ил буенча мөселманнар Ураза гаетен бәйрәм итәчәк - изге Рамазан ае тәмамланачак.

Без Югары Ослан районы имам-мөхтәсибе Гали хәзрәт Җиһаншиннан районыбызда изге Рамазан аеның ничек үтүен һәм Ураза бәйрәмен мөселманнарның ничек каршылаячагын сөйләвен сорадык.

- Изге Рамазан - Коръән иңелгән ай. Бу айда мөселманнарга ураза тоту мөһим. Иртәнге шәфәкътән алып кояш баеганчы ашаудан һәм эчүдән тыелып тору гына түгел, ураза кешенең рухи эчтәлегенә дә җаваплы карау. Аллаһыга шөкер, безнең мәчетләребезгә елдан-ел күбрәк кеше, бигрәк тә яшьләр килә. Ураза тотучылар саны шулай ук арта. Көн саен диярлек без ифтарлар үткәрдек. Районыбыз мөселманнарының иманнары ныгуына шатланмый мөмкин түгел, кешеләр рухи яктан байый, аларның ниятләре, эшләре һәм гамәлләре изге эшкә юнәлтелә. Форсаттан файдаланып, район мөселманнарын Рамазан ае тәмамланырга калган көннәрдә ураза тотарга, изге гамәлләр кылырга, мәчетләргә килергә чакырам.

Шулай ук Гали хәзрәт хәбәр иткәнчә, бәйрәм намазы Югары Ослан, Вахит, Яр Морквашында- 5.20 сәгатьтә, Яңа Болгарда - 5.30, Введенка Бистәсендә, Бакча Сарайда, Мәмәтхуҗада - 6.00, Макыл, Кызыл Байрак авылларында 6.30 сәгатьтә узачак.

"Ураза гаете - Рамазан аенда күрсәтелгән ихтыяр көче өчен Аллаһыга ышаныч һәм рәхмәт вакыты. Ураза гаете белән котлыйм! Илебезгә тыныч күк йөзе, игелек һәм иминлек телим. Аллаһы Тәгалә күңелләребездә ышанычны ныгытсын, шулай ук гадел юлга юнәлтсен. Ул барыбызның догаларын ишетсен һәм кабул итсен", - дип мөрәҗәгать итте Гали хәзрәт Җиһаншин дин тотучыларга.