Беҙҙең хеҙмәт һөҙөмтәләрен йәш быуын лайыҡлы баһалар тип ышанам

Силәбелә 4 апрелдә “Силәбе өлкәһенең билдәле башҡорттары: тарих һәм хәҙерге заман” төбәк-ара фәнни-ғәмәли конференцияһы һәм "Бөтә Рәсәй юҡҡа ғына хәтерләмәй” тарихи картиналар күргәҙмәһен асыу тантанаһы үтте. Сарала Дәүләт Йыйылышы – Ҡоролтай депутаттары Юлдаш Йосопов, Эльбрус Ниғмәтуллин етәкселегендәге Башҡортостан Республикаһы вәкилдәре делегацияһы булды. Конференция Башҡортостан Республикаһының Силәбе өлкәһендәге даими вәкиллеге булышлығында Силәбе өлкәһендәге Башҡорт тарихи-мәҙәни үҙәге тарафынан “Урал һәм Себер башҡорттары” төбәк-ара фестивале сиктәрендә Силәбе өлкәһенә йәмәғәт ярҙамы штабы майҙансығында ойошторолдо. Форумда власть органдары вәкилдәре, милли-мәҙәни берләшмәләр етәкселәре һәм активистары, ғалимдар һәм тыуған яҡты өйрәнеүселәр ҡатнашты. Онлайн-трансляцияға Силәбе, Ырымбур, Свердловск, Ҡурған өлкәләренең, Пермь крайы һәм Ханты Манси автономиялы округы – Юграның башҡорт тарихи-мәҙәни үҙәктәре ҡушылды. Үҙ докладтарында спикерҙар Силәбе өлкәһе башҡорттары тарихы, Башҡортостан тарихында күренекле шәхестәрҙең роле, уларҙың эшмәкәрлеге, шәжәрә һәм мираҫты һаҡлау мәсьәләләрен тикшерҙе. Пленар өлөштән һуң конференцияла ҡатнашыусылар 1812 йылғы Ватан һуғышында һәм 1813-1814 йылдарҙағы сит ил походтарында ҡатнашыусыларҙың мемориалына сәскә һалды. Һуңынан делегация Йәмәғәт йыйылышы йортонда тарихсы-рәссам Михаил Воронцов-Кушаковскийҙың император Александр I етәкселегендәге рус ғәскәрҙәренең Парижға тантаналы инеүенә 210 йыл тулыуға арналған картиналары күргәҙмәһен асыуҙа ҡатнашты. “Бөтә Рәсәй юҡҡа ғына хәтерләмәй” экспозицияһы тарихи ваҡиғаларҙы асыҡ күрһәтә. Һәр эш QR-код менән оҙатыла, уны сканерлап, авторҙың музыкаль әкиәтен йәки легендаһын тыңларға мөмкин. “Башҡорттарҙың тарихын, телен һәм мәҙәниәтен һаҡлауға йүнәлтелгән сараларҙың Башҡортостан Республикаһынан ситтә башҡорт халҡы күпләп йәшәгән төбәктәрҙә уҙғарылыуы ҡыуаныслы. Бөгөн беҙ китаптар сығарабыҙ, мемориаль таҡтаташтар асабыҙ, күренекле шәхестәрҙең һәм тарихи ваҡиғаларҙың хәтерен мәңгеләштереү буйынса эштәр алып барабыҙ. Беҙҙең хеҙмәт һөҙөмтәләрен йәш быуын лайыҡлы баһалар тип ышанам”, – тип билдәләне Башҡортостан Республикаһының Силәбе өлкәһендәге вәкиле Әлфир Байымов. Фото: