“Ауыл мәҙәниәт хеҙмәткәре” программаһы илдә иң яҡшыларҙың береһе тип танылды

2024 йылда Рәсәй Президенты ҡарары менән Башҡортостан Республикаһының “Ауыл мәҙәниәт хеҙмәткәре” программаһы федераль кимәлдә лә старт ала. Был хаҡта Башҡортостан Дәүләт Йыйылышы –Ҡоролтай депутаттары алдында Башҡортостан Республикаһы Хөкүмәтенең йыллыҡ отчеты менән сығыш яһап, Премьер-министр Андрей Назаров белдерҙе. – “Ауыл мәҙәниәт хеҙмәткәре” программаһы илдә иң яҡшыларҙың береһе тип танылды. Өс йыл эсендә 120 мәҙәниәт белгесе торлаҡ шарттарын яҡшыртты. Был маҡсатҡа 75 миллион һум йүнәлтелгән. Уҙған йылдан субсидия күләме ике тапҡырға артып, бер миллион һум тәшкил итте, – тип аңлатты Андрей Назаров. Үҙенең хәбәрендә ул шулай уҡ консолидацияланған финанслау ярҙамында өлгәшелгән төп күрһәткестәргә иғтибар итә. Уҙған йыл йомғаҡтары буйынса мәҙәниәтте үҫтереүгә бюджет күләме 14 миллиард һумдан ашҡан. Был 2022 йыл кимәленән 13 процентҡа тиерлек күберәк. – Бындай ярҙам ярҙамында мөһим маҡсатлы индикаторҙарҙың береһен – мәҙәни сараларға йөрөүҙәр һанын арттырып үтәү мөмкин булды. Ул план буйынса 90 миллион булһа, 120 миллион тапҡыр мәҙәниәт саралары ҡаралған. Бында Башҡортостан алдынғы өс төбәк иҫәбенә инде. Былтыр 22 мәҙәниәт объектын, шул иҫәптән Башҡорт ҡурсаҡ театрын сафҡа индерҙек, капиталь ремонтланыҡ һәм реконструкцияланыҡ. Беҙ шулай уҡ фән һәм мәҙәниәт һарайын булдырырға ниәтләйбеҙ. Был - Рәсәйҙә музей-күргәҙмә майҙандары менән беренсе интерактив фәнни-мәҙәни киңлек. Уның майҙаны яҡынса 20 мең квадрат метр тәшкил итәсәк, – тип өҫтәне Хөкүмәт Рәйесе. Биш йыл эсендә Башҡортостанда ете яңы клуб һәм балалар сәнғәт мәктәбе төҙөлгән. 86 мәҙәниәт объекты ремонтланған. 344 профилле учреждение заманса ҡорамалдар менән йыһазландырылған. 10 автоклуб һатып алынған. 16 модель китапханаһы, 11 виртуаль концерт залы һәм ике креатив индустрия мәктәбе асылған. Реконструкцияланған Сибай концерт-театр берекмәһе, “Сибай филармонияһы” булараҡ киң билдәле, 2023 йыл йомғаҡтары буйынса ҙур федераль мәҙәниәт учреждениелары менән бер рәттән Рәсәйҙә иң яҡшылар иҫәбенә инә. 2023 йылдан республикала муниципалитеттарҙа бренд сараларына дәүләт ярҙамы индерелде. Төбәктең алдынғы театрҙарының яңы тамашалары ла финанслана. Кинематография өлкәһендәге проекттар хуплана. Был йүнәлештәрҙең барыһына ла 110 миллион һумдан ашыу аҡса бүленгән. Ағымдағы йылда өс моделле китапхана булдырыу, Урғаҙа ауылында өс модуль клуб һәм ауыл мәҙәни үҙәге төҙөү, шулай уҡ Удмурт тарихи-мәҙәни үҙәген яңыртыу һәм Ауырғазы районында сыуаш тарихи-мәҙәни үҙәген асыу планлаштырыла. – Мәҙәниәтте үҫтереү принцибын мәңгелек ҡиммәттәргә оҙайлы сроклы инвестициялар булараҡ аңлау республиканың социаль-иҡтисади сәйәсәтен төҙөү өҫтөнлөктәренең береһе булып ҡала. Рәсәйҙең мәҙәниәт министры Ольга Любимова билдәләүенсә, бөгөн Башҡортостанда күп милләтле республика традициялары һаҡлана һәм арта, ә төбәк “Мәҙәниәт” милли проектын тормошҡа ашырыуҙа лидерҙарҙың береһе булып тора, – белдерҙе мәҙәниәт министры Әминә Шафиҡова. “Мәҙәниәт” милли проектына (национальный проект “Культура”) Рәсәй Президенты Владимир Путиндың май указдары менән башланғыс һалына. Фото: pravitelstvorb.ru