Өфөлә өлгөлө балалар сәләмәтләндереү лагеры ойоштороласаҡ. Башҡортостан Башлығы Радий Хәбиров республиканың баш ҡалаһы буйлап эш сәфәре барышында ошондай йөкләмә бирҙе. Бындай үҙәк төҙөү концепцияһын ҡала хакимиәте 2025-2026 йылға әҙерләргә тейеш. “Аҡсарлаҡ” һауыҡтырыу лагеры – өлгөлө балалар ялы учреждениеһы ойоштора алырлыҡ потенциаль объекттарҙың береһе. 6 апрелдә төбәк етәксеһе уның эше менән танышты һәм биләмәне артабан үҫтереү мөмкинлектәрен тикшерҙе. Өфөлә 1936 йылдан алып эшләгән лагерь майҙаны – 2,8 гектар. Уға өс уңайлы корпус, универсаль спорт комплексы, яңыртылған медицина корпусы һәм 100 урынлыҡ заманса ашхана инә. Учреждениеның проект ҡеүәте – сменаһына 95 бала. Балалар үҙәге директоры Марина Суворова әйтеүенсә, йәйгеһен лагерь дүрт сменаны ҡабул итә ала. Ә ҡышын һәм яҙын бында профилле сменалар, ярыштар һәм олимпиадалар үтә. 2023 йылда “Аҡсарлаҡ” лагеры ҡала ситендәге балалар ялы стационар учреждениеларында капиталь булмаған (тиҙ төҙөлгән) объекттар төҙөү буйынса федераль проектта ҡатнаша. Рәсәй Федерацияһы бюджетынан субсидиялар иҫәбенә бында 49 урынлыҡ яңы модулле корпус асылды. Шулай уҡ лагерҙа эргә-тирә биләмәһе төҙөкләндерелде, өҫтәл уйындары, әҙәбиәт һәм һынлы сәнғәт буйынса дәрестәр өсөн ябыҡ беседка ҡуйылды, инженер селтәрҙәре үткәрелде, өҫтәмә яҡтыртыу һәм видеокүҙәтеү системаһы монтажланды. 2024 йылда “Аҡсарлаҡ”та тағы бер модуль корпусын һала башлағандар. Төҙөүселәр майҙансыҡ әҙерләгән, нигеҙ һалған, конструкцияларҙың бер өлөшөн йыя башлаған. Ошо маҡсатҡа бөтәһе 29,4 миллион һум йүнәлтелә, шуның 24,4 миллион һумы – федераль бюджеттан. Радий Хәбиров төҙөлөш барышы менән танышты һәм ял итеү өсөн өҫтәмә зона булдырыу иҫәбенә лагерь биләмәһен киңәйтеү мәсьәләһен өйрәнергә тәҡдим итте. – Республиканың барлыҡ ҡалалары һәм райондары йәйге һауыҡтырыу кампанияһына әҙерләнә. Беҙ быға бик яуаплы ҡарайбыҙ. Күҙәтеү органдары, шул иҫәптән Ғәҙәттән тыш хәлдәр министрлығы һәм Роспотребнадзор балаларҙың һаулығы нимәгә бәйле булыуын ныҡлы контролдә тота, – тине Башҡортостан Башлығы. - Дөйөм алғанда, балалар лагерҙарына аҡса менән инергә кәрәк. Уларҙың күбеһе бик иҫкергән, мәҫәлән, “Аҡсарлаҡ” 1936 йылдан алып эшләй. Уларҙың күбеһендә ремонт талап иткән иҫкергән йоҡо корпустары бар. Беҙ яйлап был йүнәлеште үҫтерә башланыҡ. Илеш районында “Орлёнок” төркөмө яҡшы эшләй. Хәҙер “Патриот” паркы филиалдарын асабыҙ – тәүгеһен быйыл Стәрлебаш районында асабыҙ. Һәм бөгөн мин Өфө хакимиәте башлығына ҡала өсөн флагман лагеры проектын әҙерләргә тәҡдим иттем. Ә республика ярҙам итәсәк. Фото: Башҡортостан Башлығы сайты.