Дәүләт йәштәр сәйәсәте өлкәһендә йәштәрҙең башланғыстарына ярҙам итеү маҡсатында, шулай уҡ "Мәғариф" милли проекты маҡсаттарына ярашлы Дүртөйлө ҡалаһында VIII “Аҡ йылға” йәштәр форумы үтте. Был көндө башҡорт гимназияһына 120 уҡыусы – ирекмәндәр, йәмғиәтте үҫтереүгә үҙ өлөшөн индерергә теләгән лидерҙар йыйылды. Йәштәр форумы – ул проекттар һәм перспективалар, фекерҙәр, идеялар һәм үҫеш, әммә иң мөһиме, алға ынтылыш һәм һөҙөмтәләр. Форум ике этапта үтте – белем биреү һәм конкурс. Мәғариф блогында ҡатнашыусыларҙы спикерҙарҙың ҡыҙыҡлы һәм фәһемле сығыштары көтә ине, улар араһында ирекмәндәр, йәмәғәт ойошмалары лидерҙары, эшҡыуарҙар, төрлө социаль структуралар, киң мәғлүмәт саралары вәкилдәре бар. Спикерҙар дүрт майҙансыҡта эш алып барҙы: “Социаль проектлау”, “Эшҡыуарлыҡ”, “Медиа” һәм “Хәҙерге тормошта илһөйәрлек”. Икенсе бүлектә конкурсанттар үҙ проекттарын тәҡдим итте. Йомғаҡтар буйынса иң яҡшы өс проект билдәләнде, улар Дүртөйлө районы биләмәһендә үҙҙәренең башланғыстарын тормошҡа ашырыу өсөн грант ярҙамы алды. Улар “Махсус хәрби операция. Һәм геройҙар” (4-се мәктәп), “ЛогоИНТ” (4-се мәктәп) һәм “Дендрарий” (3-сө гимназия). “Был Дүртөйлө районы лидерҙарының һәм ирекмәндәренең ысын йәштәр форумы булды. Ул ҡатнашыусыларға кәрәкле белем алыу, тәжрибә уртаҡлашыу һәм үҙ идеяларын, проекттарын тормошҡа ашырыу мөмкинлеге биреүсе мәғлүмәти-мәғариф һәм дискуссия майҙансығына әүерелде. Киләсәккә яңы сағыу идеялар, ҡыҙыҡлы проекттар һәм ижади дәрт теләйбеҙ!” – тип билдәләне форумда ҡатнашыусылар. Билдәле булыуынса, “Мәғариф” (национальный проект “Образование”) милли проекты Рәсәй Президенты Владимир Путиндың май указы менән булдырылды. Фото: Дүртөйлө районы хакимиәте.