Ҡурҡмағыҙ: юғалған малайҙарҙы БПЛА менән эҙләйәсәктәр

Өфөлә 30 марттан бирле юғалған ике үҫмерҙе эҙләү әле һаман дауам итә. Улар 13 йәшлек Павел Паличев менән 14 йәшлек Дамир Әҙеһәмов. Малайҙарҙы ер өҫтөндә лә, һыу аҫтында ла, һауанан да эҙләйҙәр, тик әлегә һөҙөмтә юҡ. Бөгөн уларҙы эҙләү өсөн БПЛА йәлеп ителеүе ихтимал. Был турала Өфө граждандарҙы һаҡлау идаралығының матбуғат хеҙмәтенән хәбәр иттеләр. Осоу биләмәһе – Өфөнөң Октябрьский һәм Орджоникидзе райондарында урынлашҡан урмандар һәм баҡсасылар ширҡәттәре, шулай уҡ Ағиҙел йылғаһы яры. БПЛА менән эҙләү тураһында халыҡты айырым иҫкәртеү аңлашыла: бөгөн иртә менән күрше Татарстанда пилотһыҙ осоусы аппараттар Алабуға ҡалаһындағы сәнәғәт предприятиеһына һөжүм итте. Шуға күрә күктә бындай аппараттарҙы күреү кешеләрҙе хәүефкә һалыуы ихтимал. “Шикле БПЛА-лар күрһәгеҙ, айырыуса сәнәғәт объекттары янында, кешеләр күп йөрөгән урындарҙа, шунда уҡ ашығыс хеҙмәттәргә 112, 102 телефондары буйынса хәбәр итегеҙ”, – тинеләр ведомствола. Малайҙарҙы эҙләүгә килгәндә, штаб тәүлек әйләнәһенә эшләй. Ярҙам итергә теләһәгеҙ, Өфө ҡалаһы, 40-сы мәктәп (Шафиев урамы, 1) адресы буйынса килә алаһығыҙ. Үҙегеҙ менән йылы кейем, һыу үтмәй торған аяҡ кейеме, зарядкалы телефон, ашау, йылы сәй, скотч, фонарь алығыҙ. Павелдың билдәләре: буйы 150 сантиметр, уртаса кәүҙәле, ҡуңыр күҙле. Күк төҫтә куртка һәм итек, йәшел салбар һәм шапка кейгән. Дамирҙың билдәләре: буйы 145 сантиметр, уртаса кәүҙәле, ҡуңыр күҙле. Ҡара куртка, күк төҫтәге спорт салбарҙа һәм итектә булған. Әгәр ҙә һеҙ малайҙарҙың ҡайҙалығы тураһында берәй төрлө мәғлүмәт белһәгеҙ, 8-800-700-54-52 йәки 112 һандары буйынса шылтыратығыҙ. Фото: "Лиза Алерт".