"Яҙҙар менән килгән һөйөүем һин"

Хөсәйен Әхмәтов исемендәге Башҡорт дәүләт филармонияһы 85-се юбилей ижад миҙгелендә танылған эстрада артистарының шәхсән концерттары менән ҡыуандырыуҙы дауам итә. Башҡортостандың атҡаҙанған артисы Искәндәр Ғәзизовтың республика район-ҡалаларында барған тығыҙ гастролдәр теҙмәһендә, ниһайәт, Өфөләге концертҡа ла ваҡыт табылды. 29 мартта филармонияның ҙур залында "ЯҘҘАР МЕНӘН КИЛГӘН ҺӨЙӨҮЕМ ҺИН" тип аталған концертында Искәндәр ижадташ дуҫтары – Башҡортостан Республикаһының халыҡ артисы Әлфиә Юлсурина, Башҡортостан Республикаһының халыҡ артисы Хәлит Фәтихов, Айгөл Әсәҙуллина һәм Фәриҙә Ғаззалова менән сығыш яһаны. Музыканттар, төрлө конкурстар лауреаттары: баянда - Салауат Хәлилов, саксофонда - Арыҫлан Оморҙаҡов, флейтала - Адель Киселевская. "Звездный путь" һәм "Созвездие" бейеү төркөмдәре бейеүселәре сағыу сығыштары менән биҙәне. Концертҡа Искәндәр Ғәзизовтың ижадын яратҡан, хөрмәт иткән ҡәҙерле ҡунаҡтар ҙа килде - "Артыш" Белорет районы яҡташтар ойошмаһы етәксеһе Рәйес Исмәғилев һәм "Башҡортостан" гәзитенең дәүләт һәм сәйәсәт бүлеге мөдире Рәмилә Мусина. Улар үҙҙәренең йылы һүҙҙәрен, матур теләктәрен еткерҙе, бүләктәр тапшырҙы. Һәр йыл һайын шаулап-гөрләп килгән яҙ күңелдәрҙе дәртләндергән, ашҡындырған мәлдә йырсы Искәндәр Ғәзизов яратҡан тамашасыһына йырҙарын бүләк итмәй ҡалғаны юҡ. Хисле, тылсымлы, күңелдәрҙе арбар моңло тауышы, ихласлығы, ябайлығы менән халҡыбыҙҙың оло һөйөүен яулаған йырсыбыҙ репертуары өҫтөндә даими эшләне, тамашасы хөкөмөнә яңынан-яңы йырҙар сығарҙы. Уның башҡарыуында хиттарға әйләнгән популяр йырҙар, шулай уҡ өр-яңы йыр премьералары ла яңғыраны концертта. "Һәр йыл һайын шаулап-гөрләп килгән яҙҙарҙа артабан да осрашырға, күрешергә яҙһын. Концертыма килгәнегеҙгә, ихлас алҡыштарығыҙға сикһеҙ рәхмәт, иҫән-һау булайыҡ, яңынан осрашҡанға тиклем, ҡәҙерле тамашасыларым!" - тип тамамланы шәхсән концертын Башҡортостандың атҡаҙанған артисы Искәндәр Ғәзизов. Шулай уҡ концерт ваҡытында Искәндәр Ғәзизов ҡытыны Элинаға: "Йөрәгемдең түрендә булған минең берҙән-берем, таянысым, йыуанысым, ярҙамсым, миңә түҙгән кеше, кейендергән һәм ҡараған тормош иптәшем Элинам бөгөн залда ултыра. Рәхмәт һиңә, ҡәҙерлем!" - тип рәхмәт белдереп, сәскә бүләк итте. Сағыу кисәнең режиссеры — Башҡортостан Республикаһының атҡаҙанған сәнғәт эшмәкәре, Башҡортостандың атҡаҙанған артисы Сулпан Асҡарова. Концертты Башҡортостандың атҡаҙанған артисы Эльмира Юлдашева алып барҙы. Концерт залы ла, балкон да тамашасы менән тулы ине. Артисты һәр йырынан һуң уны сәскә гөлләмәләренә, бүләктәргә күмделәр. Ошо артист өсөн иң ҙур баһа бит! Афарин, Искәндәр! Уңыштар теләйбеҙ! Ләйсән Миңлеханова фотолары. Мәғлүмәт сығанағы: Башҡорт дәүләт филармонияһы.