Бөрйән районы хакимиәте башлығы Ғәзиз Манапов үҙенең "Бәйләнештә"ге сәхифәһендә махсус хәрби операция биләмәһендә булған яҡташтарына гуманитар ярҙам алып барыуҙары хаҡында яҙған. "Гуманитар ярҙам уңышлы алып барып еткерелде. Тәүҙә Луганск өлкәһендә булып, Даян Мурзин исемендәге батальонда хеҙмәт итеүсе егеттәребеҙгә "ГАЗ-66", күсмә мунсаны, туғандарынан һәм яҡындарынан шәхси посылкалар, маскировка селтәрҙәре һәм башҡа әйберҙәрҙе тапшырҙыҡ. Әйтергә кәрәк, Даян Мурзин исемендәге батальондың бер ротаһында командир булып “Алдар” позывнойлы яҡташыбыҙ хеҙмәт итә. Уның ҡулы аҫтындағы егеттәр яҡташыбыҙ тураһында бик йылы һүҙҙәр әйтте, һәләтле, оҫта командирҙан ҡәнәғәтбеҙ, тиҙәр. Шулай уҡ Луганск өлкәһендә ремонт бригадаһында хеҙмәт итеүсе егеттәргә бысҡы, эш ҡоралдары һәм башҡа кәрәк-яраҡ тапшырҙыҡ. Артабан Донецк өлкәһендәге бер нисә подразделениела яҡташтарыбыҙ менән осрашып, уларҙы яҡындары ебәргән шәхси посылкалар һәм сәләмдәре менән ҡыуандырҙыҡ. Шунда уҡ сәнғәт мәктәбе бүләк иткән ҡурайҙарҙа “Бөрйән егеттәре”н һыҙҙырып уйнап та алдыҡ. Сәфәр барышында беҙҙе ҡаршы алып, ярҙам итеп йөрөүсе, изге Ураҙа айында ауыҙ астырған “Башҡорт” һәм “Бөрйән” позывнойлы егеттәребеҙгә айырыуса рәхмәт. Район халҡының берҙәм йыйып ебәргән ярҙамы яугирҙәребеҙгә көс өҫтәр, ауырлыҡтарҙы лайыҡлы еңеп сығырға булышлыҡ итер, тип ышанам. Ошо изге эшкә өлөшөн индергән барлыҡ район халҡына, хеҙмәт коллективтарына, эшҡыуарҙарға һәм ярҙам ҡулын һуҙғандарҙың барыһына ла рәхмәт һүҙҙәрен еткерәм. Айырым рәхмәтемде юлдаштарыма, ылауҙы алып барып тапшырыусы водителдәр Илнур Фәйзулла улына һәм Рәмил Илһам улына, район ветерандар советы рәйесе Олег Марс улына белдерәм", - тип яҙған ул. Фото: Ғәзиз Манаповтың "Бәйләнештә"ге сәхифәһенән.