Башҡортостандың Нуриман урман хужалығы биләмәһендә урман янғындарын һүндереү буйынса тәүге уҡыуҙар үтте. Урман янғындарынан күрелгән зыянды кәметеү һәм уны беренсе тәүлектә үк һүндереү – “Экология” милли проектының төп маҡсаттарының береһе. Уҡыуҙарға Нуриман, Бөрө, Иглин, Өфө урман хужалыҡтары, Борай һәм Ҡалтасы урманының автономиялы учреждениелары, Өфө район-ара территориаль бүлеге вәкилдәре, шулай уҡ “Өфө” ЛПС–III тибындағы урман янғындарын иҫкәртеү һәм һүндереү-ҡотҡарыу хеҙмәтенең Нуриман участкаһы хеҙмәткәрҙәре, урман участкаларын ҡуртымға алыусылар һәм башҡа хеҙмәттәр йәлеп ителде. Күнекмә барышында унда ҡатнашыусылар ведомство-ара эш итеүҙең нисек яйға һалыныуын, янғын хәүефе тураһында мәғлүмәт тапшырыу өлөшөндә вазифалы кешеләрҙең эш итеү алгоритмдарын үҙләштерҙе. Дөйөм алғанда, шартлы урман янғынын һүндереү буйынса күнекмәләргә йәлеп ителгән бөтә хеҙмәттәр һәм ведомстволар яйға һалынған эште күрһәтте. Алдағы урман янғындары миҙгеленә әҙерлек планға ярашлы бара. – Урмандарҙа янғын хәүефһеҙлеген күҙәтеү өсөн 2024 йылда 4 миллион гектар майҙанда урмандарҙы авиация ярҙамында күҙәтеү планлаштырылған. Дөйөм осош 700 сәғәт тирәһе тәшкил итәсәк. Бөгөнгө көнгә урман янғындарын һүндереүгә 177 берәмек махсуслаштырылған урман янғындарын һүндереү техникаһы әҙерләнгән. 40 миллион һум суммаға тағы һигеҙ берәмек урман янғындарын һүндереү техникаһы ҡайтарылыуы көтөлә. Шулай итеп, республика Урман хужалығы министрлығының урман янғындарын һүндереү станцияларын махсус техника менән йыһазландырыу ағымдағы йылда республика өсөн федераль үҙәк менән билдәләнгән нормативтан 100 процентты тәшкил итәсәк, – тине Башҡортостан Республикаһының урман хужалығы министры Марат Шәрәфетлдинов. Билдәле булыуынса, “Экология” (национальный проект “Экология”) милли проекты Рәсәй Президенты Владимир Путиндың май указы менән булдырылды. Фото: Урман хужалығы министрлығы.