Борон-борондан илгә һынау килгәндә бар халыҡ асыу-үпкәһен онотоп, бер йоҙроҡ булып берләшкән, барлыҡ ауырлыҡтарҙы бер иң булып күтәргән. Махсус хәрби операция башланғас та Стәрлебаш районының Аллағыуат ауылы биләмәһе районда иң тәүгеләрҙән булып илдең именлеген һаҡлаған егеттәребеҙгә матди ярҙам ойоштора башланы. Ҡатын-ҡыҙҙарыбыҙ йөн ойоҡбаштар, өс бармаҡлы бирсәткәләр бәйләне. Был эштә айырыуса Нәзиә Бикташева, Глүзә Ғәлимова, Нурия Асҡарова ҙур тырышлыҡ күрһәтте. Шулай уҡ гуманитар ярҙам йыйғанда өй туҡмастарын, ауыҙҙа иреп торған бауырһаҡтар бешереп, уларҙы контейнерҙарға тултырып ебәрҙек. Йылы юрған, одеял, тәм-том килтереүселәр ҙә булды. Тыуған яҡтың шифалы үләндәре һалдаттарыбыҙға көс бирһен тип, шифалы үлән сәйҙәрен дә изге доғалар уҡып оҙаттыҡ. Халыҡтан йыйылған аҡсаны кәрәкле ҡорамалдар алыуға тәғәйенләнек. Яугирҙәрҙең: “Һеҙҙең үреп ебәргән маскировка селтәрҙәре яҡшы һаҡлай”, – тигән сәләмдәрен ишетеп-белеп торғас, был эшкә лә әүҙем тотондоҡ. Хаҡлы ялдағы хәрби Фәрит Әхмәт улы Хәмиҙуллин таҫмалар ҡырҡыу станогы яһап биргәс, маска-селтәрҙәр үреүгә дәррәү тотондоҡ. Бөгөнгә төрлө үлсәмдәге 25 берәмек селтәрҙәрҙе махсус хәрби операцияға оҙаттыҡ. Илебеҙ һағында торған һәр бала һәр әсәгә ғәзиз, уларҙың имен-аман Еңеү менән ҡайтыуын барыбыҙ ҙа түҙемһеҙлек менән көтәбеҙ. Шуға ла ҡатын-ҡыҙҙар көн һайын кисен ауыл мәҙәниәт йортона йыйылып, ваҡытын йәлләмәй, бар күңелен биреп эшләне. Үргән маска-селтәрҙәребеҙ егеттәребеҙҙең ғүмерҙәрен һаҡлаһын, техникаларын, блиндаждарын дрондарҙан ҡаплаһын, тип доғалар уҡыныҡ, мөнәжәттәр әйттек. Маскировка селтәрҙәрен үреү буйынса күрше Йәлембәт һәм Ҡабаҡыуыш ауылдары ҡатын-ҡыҙҙарына оҫталыҡ дәрестәрен күрһәтеүҙә йәштәребеҙ Альбина Бикташева, Альбина Уляева, Гөлназ Моратова һәм башҡалар әүҙем ҡатнашты. Был изге эште башлап йөрөүсе ирекмән Зөлфиә Хәсән ҡыҙы Ҡолһаринаны, ғаиләләре менән беҙҙе дәртләндереп, рухи терәк булып тороусы Зифа Ғәбит ҡыҙы Хәмиҙуллинаны һәм Эльвера Фәрит ҡыҙын айырыуса билдәләп, рәхмәт әйтке килә. “Үҙебеҙҙекеләрҙе ташламайбыҙ!”, “Берҙәмлектә – көс!” – девиздары беҙҙең өсөн хәҙер көнүҙәк. Аллағыуат ауыл биләмәһе халҡы төрлө саралар уртаһында ҡайнап йәшәй. Мәҙәниәт усағына күрше ауылдарҙан да, район үҙәгенән дә төрлө сығыштар, концерттар менән килеп торалар. Ауыл биләмәһе “Айыҡ ауыл” конкурсында ла ҡатнаша. Махсус хәрби операцияға киткән егеттәребеҙҙең ата-әсәләренә утын килтереү, уларға төрлө яҡлап ярҙам итеү – әлеге көндә иғтибар үҙәгендә. Аллағыуат ауыл хакимиәте халыҡ менән бергә яҡшы һәм матур эштәр алып бара. Өс ауылдың зыяраттан таҙартып, кәртәләрҙе буяу, юл ситендәге үләндәрҙе сабыуға йәштәр ҙә йәлеп ителә. Был эштә айырыуса фермерҙарыбыҙ – Алик Салауат улы Бикташев менән Илнур Фәнүр улы Ҡолһарин ҙур ярҙам күрһәтә. Тылдағы хеҙмәт һәм ярҙам һалдаттарыбыҙға терәк һәм рухи көс өҫтәһен, окоп шәмдәре күңелдәрен дә йылытһын, еңеүгә алып барған юлдарын да яҡтыртһын! Автор: Зифа ҠОЛҺАРИНА, Стәрлебаш районы. Фото: Зифа Ҡолһаринаның ғаилә альбомынан.