Дасканальна адпрацавана тэхналогія пасяўной у ААТ "Семежава", дзе вясенне-палявыя работы пачалі аднымі з першых у раёне, а вось сяўбу яравых збожжавых ужо нават паспелі скончыць. Палі гаспадаркі цешаць вока сваёй дагледжанасцю.
– Нават самыя вопытныя аграрыі не памятаюць, каб работы ў полі пачыналіся ў лютым, – разважае начальнік аддзела раслінаводства ААТ "Семежава" Мікалай Кулік. – У гэтым годзе апрацоўку глебы пачалі яшчэ ў канцы апошняга месяца зімы, прыкладна тыдні на два раней, чым у мінулым, затым на палі выйшлі сеялкі. Каб атрымаць добрыя намалоты, пасеяць яравыя збожжавыя трэба тыдні за два-тры. Далейшае прамару-джванне з тэрмінамі прыводзіць да страты ўраджайнасці. Ды і самі яравыя будуць больш устойлівыя да шкоднікаў.
Пачалі з ячменю, бо гэтая культура непатрабавальная, найбольш холадаўстойлівая з яравой збожжавай групы.
– Пад яго адвялі 100 га: сяўба днямі ўжо скончана, – расказвае Мікалай Міхайлавіч. – Прыступілі і да іншых культур. Усяго ж пад пасяўныя плошчы ў гаспадарцы адведзена 2130 га. З іх яравыя збожжавыя і зернебабовыя зоймуць 150 га, грэчка і проса – 80 га, на 1250 гектарах запланавана кукуруза. Дарэчы, кожны год яе пасяўныя плошчы павялічваем. На 600 га пасеем цукровыя буракі і 50 га – аднагадовыя травы.
Сяўбу ўжо які год запар давяраюць вопытнаму механізатару Сяргею Гардзею, які на трактары К-742 з сучасным пасяўным агрэгатам "Horsch" з году ў год шчыруе на семежаўскіх палях. Па словах механізатара, сеялка добрая: дзякуючы сваёй магутнасці захоплівае і апрацоўвае адразу шэсць метраў глебы. За дзень удаецца засеяць у сярэднім 50-55 гектараў. Тэхніка настолькі "разумная", што насенне закладваецца раўнамерна: на кожным квадратным сантыметры глебы і на зададзеную глыбіню без якіх-небудзь страт для гаспадаркі. Таму пасевы ўзыходзяць хутка і дружна.
– Ад маёй працы залежыць будучы ўраджай, таму трэба быць уважлівым, сачыць за якасцю сяўбы, – падзяліўся Сяргей Аляксандравіч. – Тэхніка, як ужо адзначаў, надзейная, не падводзіць, ды і настрой добры. Так што бу-дзем працаваць.
У гаспадарцы ўжо некалькі гадоў выкарыстоўваюць перадавыя тэхналогіі дакладнага земляробства. У кабіне магутнага расійскага трактара ўстаноўлена сучасная навігацыйная сістэма. У механізатара ёсць магчымасць з кабіны (гэта значыць дыстанцыйна) уводзіць сельгасмашыну ў працу, кіраваць яе рэжымамі і прадукцыйнасцю, напрыклад, шчыльнасцю пасеву, аб’ёмам унясення ўгнаенняў і г.д. Да таго ж, гэта значна аблягчае працу механізатара, а таксама дазваляе эканоміць паліва.
На падвозе насення працуе Сяргей Пяцігорац. Выбраўшы прафесію вадзіцеля, мужчына пайшоў па шляху бацькі. Нават служба ў войску не парушыла планаў. Уладкаваўся на працу ў мясцовую гаспадарку: уцягнуўся – і застаўся.
– Падабаецца працаваць з тэхнікай, – дзеліцца Сяргей Мікалаевіч. – У давераных ЗІЛ і ГАЗ-53 ведаю кожную дэталь механізму. Не раз мяняў запчасткі, перабіраў сваімі рукамі. А каб машыны яшчэ доўга служылі, трэба даглядаць іх, было б жаданне.
– Стаўку сёлета зрабілі на азімыя культуры, яны даюць вялікую аддачу, – падкрэсліў Мікалай Кулік. – Усе культуры перазімавалі нядрэнна, вось толькі замаразкі і стрымліваюць развіццё раслін. Будзем спадзявацца, што надвор’е не падвядзе хлебаробаў і ўраджай атрымаем добры.
У гаспадарцы ўжо праведзены па дзве падкормкі азімых, што таксама ўплывае на будучы ўраджай. На гэтых работах задзейнічаны Іван Бондар, Уладзімір Крупадзёраў, Пётр Шчатко.
Фота аўтара
Аграрии ОАО "Семежево" сев озимых яровых провели ячменем
