Махсус хәрби операция башланғандан алып Әлшәй районындағы предприятиелар, учреждениелар, ойошмалар, йәмәғәт хәрәкәттәре, эшҡыуарҙар, фермерҙар һәм ирекмәндәр гуманитар ярҙам йыйып, махсус хәрби операция биләмәһенә оҙата. Был хәйриә акцияһына ҡушылмаған бер генә ауыл да юҡ: халыҡ яугирҙәр тыуған йорт йылыһын тойһон өсөн йылы ойоҡбаштар бәйләй, туҡмас киҫә, башҡа өй ризыҡтары әҙерләй. Һәр ерҙә кешеләр көндәлек кәрәк-яраҡ йыя, алғы һыҙыҡта мөһим булған әйберҙәр, ҡорамалдар, медикаменттар һатып алыу өсөн аҡса йыйыуҙа ҡатнаша. Уҡыусылар блиндаж шәмдәре әҙерләй, тиҙерәк Еңеү яулап ҡайтыуҙарын теләп, хәрбиҙәргә хаттар яҙа. Изге эштән Әлшәй ерендә тыуып-үҫкән билдәле яҡташтары ла ситтә ҡалмаған. Үткән айҙа район мәҙәниәт һарайы сәхнәһендә “Беҙ бергә!” тип аталған хәйриә концерты ойошторолған. Илһөйәрлек менән һуғарылған матур сара тураһында беҙгә район гәзите хәбәрсеһе Фәнүзә Суфиянова бәйән итте. ...Әлшәйҙәрҙең талантлы яҡташтары менән көтөп алынған осрашыу сараһы был юлы махсус хәрби операцияға арналған – эстрада, театр, әҙәбиәт өлкәһендә үҙ юлын тапҡан һәләтле яҡташтар алғы һыҙыҡта йөрөгән яугирҙәргә ярҙам итеү, уларҙың рухын күтәреү өсөн йәнә бер сәхнәгә йыйылған. Сарала танылған әлшәйҙәр – Башҡортостандың халыҡ шағиры Гөлфиә Юнысова, композиторҙар Наил Шәймәрҙәнов, Урал Рәшитов, сәсәниә Розалиә Солтангәрәева һәм уның улы, виртуоз скрипкасы Илшат Мөслимов, артистар Светлана Хәкимова, Әхмәр Әхмәҙуллин, Фәриҙә менән Роберт Тимербавтар, Башҡорт дәүләт филармонияһы артисы Юлай Муллаянов, баянсы Фәрүәз Килдеғолов, йырсылар Рөстәм Ғиззәтуллин, Гөлсинә Мөхәмәҙиева, Эльвира Мөхтәрова ҡатнашҡан. Әлшәйҙәрҙе хуплап, был күркәм сараға Башҡортостандың халыҡ артисы Әлфиә Юлсурина һәм автор-башҡарыусы Зарема Әйүпова ла килгән. Наил Садиҡов етәкселегендәге “Күгиҙел” ҡурайсылар ансамбле, Алик Ғәбделмәнов етәкселегендәге “Дарман” ирҙәр вокаль ансамбле, Өфө дәүләт нефть техник университетының талантлы студенты Наил Сираев, хореограф, бейеүсе Азамат Кәримовтың сығыштарын тамашасылар бик йылы ҡабул иткән. Концерттан йыйылған аҡса махсус хәрби операцияла ҡатнашҡан яугирҙәргә ярҙам күрһәтеү буйынса райондың хәйриә фондына ебәрелгән. Махсус хәрби операция биләмәһендәге Әлшәй ир-егеттәренең барыһы ла – Ватанға һәм изге бурысына тоғро ысын яугирҙәр. Әлшәй халҡы яҡташтары менән ғорурлана һәм уларҙың тиҙерәк еңеп, тыуған яҡҡа әйләнеп ҡайтыуҙарын өмөтләнеп көтә. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондара аша, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ.Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Мәғлүмәт– Фәнүзә Суфиянованан. Светлана Ғилманова фотолары. Һүрәттәрҙә: Әлшәй таланттары ла яугирҙәргә ярҙамдан ситтә ҡалмай.