Хөкүмәттә кәңәшмә үтте

Башҡортостан Хөкүмәте ултырышында республика Премьер-министры Андрей Назаров рәйеслегендә тирә-яҡ мөхиткә кире йоғонто яһаусы I категориялы объекттарға комплекслы экологик рөхсәт биреү кәрәклеге мәсьәләһе тикшерелде. I категориялы 114 объект 2025 йылдың 1 ғинуарына тиклем комплекслы экологик рөхсәтте рәсмиләштерергә тейеш. Был берҙәм документ бөтә рөхсәт биреүсе тәбиғәтте һаҡлау документацияһын алмаштыра. Премьер-министр билдәләүенсә, комплекслы экологик рөхсәт алыу ваҡыты ҡыҫҡартылған һәм республиканың Сәнәғәт, Экология, Ауыл хужалығы министрлыҡтарына һәм Торлаҡ-коммуналь хужалыҡ министрлыҡтары контролендәге предприятиелар менән эште тиҙ арала ойошторорға ҡушты. Хөкүмәт ултырышында Башҡортостанда бәләкәй форматтағы сауҙаны үҫтереү мәсьәләһе лә тикшерелде. Министрҙар кабинеты башлығы билдәләүенсә, мобиль сауҙаны үҫтереү алыҫ һәм юлы ауыр тораҡ пункттарға ла, шулай уҡ юл хәрәкәтендә ҡатнашыусыларға ла сауҙа хеҙмәтләндереүен тәьмин итеүҙә мөһим йүнәлештәрҙең береһе булып тора. Премьер-министр Андрей Назаров Башҡортостандың Сауҙа һәм хеҙмәттәр министрлығына муниципаль райондар һәм ҡала округтары араһында план күрһәткестәрен декомпозициялауҙы үткәрергә ҡушты. Андрей Назаров төбәктең хужалыҡ итеүсе субъекттары тарафынан объекттарҙың санитар-һаҡлау зоналарын рәсмиләштереү мәсьәләһен дә күтәрҙе. Тәбиғәтте һаҡлау талабын үтәү ваҡыты 2025 йылдың 1 ғинуарында башлана. Ул республиканың Ер һәм мөлкәт мөнәсәбәттәре министрлығына һәм Төҙөлөш һәм архитектура министрлығына муниципалитеттар менән үҙ-ара килешеп, ҡала төҙөлөшө ҡануниәте талаптарын үтәү өҫтөнән контролде көсәйтергә һәм тыйылған объекттар өсөн санитар-һаҡлау зоналары сиктәрендә ер участкаларын бүлеүгә юл ҡуймаҫҡа ҡушты. Башҡортостан биләмәһендә "Хәүефһеҙ ҡала" аппарат-программа комплексын үҫтереү ҙә Премьер-министр Андрей Назаров етәкселегендәге Хөкүмәт ултырышында тикшерелгән тема булды. Министрҙар кабинеты башлығы билдәләүенсә, төбәктә һанлы технологиялар, шул иҫәптән хәүефһеҙлекте тәьмин итеү өлкәһендә лә, әүҙем индерелә. - Йыл дауамында үткәрергә планлаштырылған күп һанлы халыҡ-ара сараларҙы иҫәпкә алып, Ғәҙәттән тыш хәлдәр буйынса дәүләт комитетынан Финанс министрлығы менән берлектә аппарат-программа комплексының хоҡуҡ һаҡлау сегментын үҫтереүгә өҫтәмә финанслау мөмкинлектәрен бүлеү тураһында тәҡдимдәр индереүҙәрен һорайым, - тип Андрей Назаров кәңәшмә йомғаҡтары буйынса йөкләмә бирҙе. Ултырышта инвестиция проекттарын кредит менән тәьмин итеү өсөн ер участкаларын ҡуртымға алыу хоҡуғын залогҡа тапшырыу механизмын тормошҡа ашырыу буйынса тәҡдимдәр ҙә тикшерелде. Министрҙар кабинеты башлығы билдәләүенсә, дәүләт ярҙамы сараларының киң даирәһен булдырыу арҡаһында Башҡортостанда бизнес алып барыу өсөн уңайлы шарттар булдырылған. Шундай сараларҙың береһе - инвесторҙарға күләмле инвестиция проекттарын тормошҡа ашырыу өсөн сауҙалашыу үткәрмәйенсә ер участкалары биреү. Сығанаҡ: https://pravitelstvorb.ru/news/23380/ https://pravitelstvorb.ru/news/23381/ https://pravitelstvorb.ru/news/23383/ https://pravitelstvorb.ru/news/23384/ https://pravitelstvorb.ru/news/23382/