Редик Ғәниевте сит өлкәләрҙә лә яҡшы беләләр

"Башҡортостан" гәзитенең "Бәйләнештә" селтәрендә 27 мартта билдәләнгән Халыҡ-ара театр көнө айҡанлы иғлан иткән конкурсыбыҙ бик әүҙем бара. Бөгөн һеҙҙе тағы бер матур коллектив – Краснокама районының "Замандаш" халыҡ театры менән таныштырабыҙ. Төркөмдәге дуҫтарыбыҙҙы республикабыҙҙа эшләгән талантлы, һоҡланғыс коллективтар өсөн тауыш бирергә саҡырабыҙ. Конкурс 26 мартҡа ҡәҙәр дауам итә. 26 мартта, киске сәғәт 9-ҙа, иң күп тауыш йыйған өс халыҡ театры етәксеһе билдәләнә. Краснокама район мәҙәниәт йортонда эшләп килгән "Замандаш" халыҡ театры 1977 йылда Ғасиман Ширғазин етәкселегендә ойошторола. 1997 йылда, милли театрҙарҙың "Алтын тирмә" төбәк-ара фестиваленең зона турында ижади коллективҡа "халыҡ театры" исеме бирелә. Бөгөн "Замандаш" халыҡ театрын Редик Фирҙәүес улы Ғәниев лайыҡлы етәкләй. Коллектив район, күрше-тирә төбәктәрҙең тамашасыларын үҙенсәлекле спектаклдәр менән ҡыуандырып тора, шулай уҡ төрлө ижади конкурстарҙа, фестивалдәрҙә лә йыш ҡатнашалар, уңыштары ла тос ҡына. Халыҡ театры ошонда уйнап, сәхнә ветерандары булып танылған Флүс Яҡупов, Рәмил Лотфуллин кеүек һәүәҫкәр артистар менән ғорурлана. Зөһрә Ғилфанова, Миңлегөл Лотфуллина, Альбина Миңлеәхмәтова тыуҙырған сағыу образдар ҙа тамашасы күңеленә хуш килә. Театр сәнғәтенә йәштәрҙең, мәктәп уҡыусыларының ылығыуы - ҡыуаныслы күренеш. Тимур Садиҡов, Амаль Вәлиәхмәтов, Самира Исламова сәхнәлә үҙҙәрен таныта бара. "Замандаш" халыҡ театрының режиссеры Редик Ғәниев – үҙе лә үҙенсәлекле талантҡа эйә шәхес. Ул күп һанлы район сараларының режиссеры ла. Һөнәренең оҫтаһы булараҡ, ул Башҡортостанда ғына түгел, күрше республика һәм өлкәләрҙә лә танылыу алған. Күптән түгел "Театр. Ижад. Талант" тип аталған ауыл театрҙары фестиваленең һөҙөмтәләре буйынса "Ауыл үҙешмәкәр театрының иң яҡшы етәксеһе (режиссеры)" номинацияһында еңеүсе булараҡ билдәләнгән. Сығанаҡ һәм фотолар: Краснокама районының Үҙәк район мәҙәниәт йорто сайтынан һәм Р. Ғәниевтең шәхси альбомынан.