Эшегеҙ өсөн рәхмәт!

25 мартта Хөкүмәттең оператив кәңәшмәһендә Стәрлетамаҡ икмәк комбинатының эшмәкәрлеге тикшерелде. Предприятиеның генераль директоры Юлия Герасимова комбинаттың 1909 йылда эшләй башлауы тураһында һөйләне. Уны ойоштороуға сауҙагәр Сидор Жилкиндың икмәкханаһы нигеҙ була. Сәнәғәттең үҫеүе һәм ҡала халҡының байтаҡ артыуы һөҙөмтәһендә продукция сығарыу күләме арта. Ә 1954 йылда тәүге типовой завод төҙөгәндәр. 2007 йылдан Стәрлетамаҡ икмәк комбинаты продукцияһы “Стерх” сауҙа маркаһы аҫтында эшләй. Бөгөн предприятие составында алты завод эшләй, улар 200-ҙән ашыу төр икмәк-ҡалас һәм кондитер изделиелары сығара. – 2023 йылда предприятиеның әйләнеше 870 миллион һум тәшкил иткән, был 2022 йылғы кимәлдән ике процентҡа күберәк, - тип билдәләне Юлиә Герасимова. - Ай һайын икмәк комбинаты 660 тонналап продукция етештерә. Стәрлетамаҡ һәм көньяҡ райондар уны һатыуҙың төп баҙары булып тора. Әҙер тауарҙың 30 процентын үҙебеҙҙең фирма магазиндары аша һатабыҙ. Стәрлетамаҡ икмәк комбинаты – социаль йүнәлештәге предприятие, унда 568 кеше эшләй, тип өҫтәне Юлиә Герасимова. 2023 йылда хеҙмәткәрҙәрҙең уртаса эш хаҡы айына 47,5 мең һумға еткән, был уҙған йылдан 12,5 процентҡа юғары. Махсус хәрби операция башланғандан алып компания Башҡортостандан хәрби хеҙмәткәрҙәргә, шулай уҡ уларҙың ғаилә ағзаларына даими ярҙам күрһәтә. Стәрлетамаҡ икмәк комбинаты намыҫлы һалым түләүсе. 2023 йыл йомғаҡтары буйынса предприятие төрлө кимәлдәге бюджеттарға һәм страховка фондтарына 219 миллион һум күсергән, шуның 45 миллион һумы - республика ҡаҙнаһына. Бынан тыш, һуңғы биш йылда икмәк комбинаты производствоны яңыртыуға 175 миллион һум аҡса инвестициялаған. Предприятие ҡалас етештереү бинаһының майҙанын 318 квадрат метрға арттырған, тәүлегенә 20 тонна икмәк бешереү буйынса яңы линия ҡуйған, үҙәк ҡаҙанлыҡта эшләгән пар ҡаҙандарын замансаға алмаштырған, он һаҡлау складын яңыртҡан, 15 махсус автомобиль һатып алған. – Беҙҙең инвестиция эшмәкәрлеге ғәмәлдәге дәүләт ярҙамы сараларында ҡатнашыу ярҙамында тормошҡа ашырыла, – тине Юлиә Герасимова. – 2019 йылдан предприятие он һатып алыуға кредит аҡсаһын льготалы процент ставкаһы буйынса файҙалана. 2023 йылда 149 миллион һум ҡыҫҡа кредит йәлеп ителгән. Ошо ярҙам иҫәбенә ирекле әйләнештәге средстволар инвестицияларға йүнәлтелде. Республика программаһы буйынса комбинатҡа 8 миллион һум ҡайтарылған. Башҡортостан Башлығы Радий Хәбиров Стәрлетамаҡ икмәк комбинаты коллективына һөҙөмтәле эшләгәндәре өсөн рәхмәт белдерҙе. – Был – ныҡлы, яҡшы предприятие, беҙ уның уңыштарына ҡыуанабыҙ, – тине Радий Хәбиров. – Мин программаларыбыҙ менән файҙаланыуҙы дауам итергә кәңәш итәм. Һеҙҙең коллектив ҙур, уны һаҡларға ла, республиканы икмәк менән тәьмин итергә лә кәрәк. Эшегеҙ өсөн ҙур рәхмәт. Беҙ һәр ваҡыт һеҙгә ярҙам итергә әҙер. Фото: Башҡортостан Башлығы сайты.