Театр көнө – ул бөтә донъя ғына түгел, ә милли һәм дини сиктәрҙе белмәгән дөйөм кешелек байрамы ла. Бөтә донъя театр көнө 27 мартта билдәләнә. Байрам халыҡ-ара театр институты инициативаһы менән 1961 йылда булдырыла. Тәүге тапҡыр байрам 1962 йылда үткәрелә. Республикабыҙ халыҡ таланттарына бик бай. Һәр бер районда, һәр ауылда тиерлек үҙешмәкәр театрҙар эшләп килә. Уларҙың күбеһе “халыҡ” исеме алыуға өлгәшкән. Халыҡ театрҙарының һөнәри байрам көнө алдынан гәзитебеҙҙең “Бәйләнештә” социаль селтәре төркөмөндә “Халыҡ таланттары” тигән конкурс иғлан ителде. Республикабыҙҙың 27 районынан коллектив етәкселәре бәйгегә сыҡты. Конкурсанттар араһында Йылайыр районынан Зилә Солтанова ла бар. Ул Йылайыр мәҙәниәт йортоноң “Нәжәғәй” халыҡ театры етәксеһе. Театр 2011 йылдан эшләп килә. Күп йылдар уға Миңзифа Кинйәбулатова етәкселек итә. Миңзифа Ҡорбанғәле ҡыҙы Йылайыр мәҙәниәт йорто директоры вазифаһына күскәс, театрҙы Зилә Ҡорбанғәле ҡыҙы етәкләй башлай. 2023 йылда коллектив халыҡ исеменә лайыҡ була. - Мин комедия алам, драма ҡуйғаным юҡ. Элекке йыл Ҡәбир Аҡбаштың “Һипкелле ҡыҙ”, былтыр Рәлиф Кинйәбаевтың “Әбей урлау” комедияларын ҡуйҙыҡ. Быйыл рус телендә әҙерләйбеҙ. Тормошта былай ҙа мәшәҡәт, күңелһеҙ хәлдәр етәрлек. Шуға күрә тамашасы спектакль ҡарап күңеле күтәрелеп ҡайтырлыҡ репертуар һайлайым, – ти Зилә Ҡорбанғәле ҡыҙы. Зилә Солтанованың мәҙәниәт юлын һайлауы осраҡлы түгел. Уның әсәһе Ғәлиә Таһирова ғүмерен ауылда мәҙәниәт усағы менән бәйләгән кеше. Зилә Ҡорбанғәле ҡыҙы 10 класты тамамлағас бер йыл Бараҡал (рәсми атамаһы Яңы Преображенка) ауыл клубында эшләгәндә лә спектаклдәр ҡуйып йөрөйҙәр. Икенсе йылына Стәрлетамаҡ Башҡорт мәҙәниәт техникумына уҡырға инә. Зилә Солтанова күп йылдар мәғариф өлкәһендә эшләй. Мәҙәниәт барыбер үҙенә тарта. 15 йылға яҡын “Шатлыҡ” вокал ансамблендә сығыш яһай, спектәклдәрҙә ҡатнаша. Әлеге көндә “Нәжәғәй” халыҡ театрында төрлө һөнәр кешеләрен берләштерә. Уларҙың араһында балалар баҡсаһы тәрбиәселәре, уҡытыусылар, район хакимиәте хеҙмәткәрҙәре һәм хатта һаҡсы ла бар. Сығыштар өсөн костюмдарҙы күбеһенсә үҙҙәре эшләй. Әкиәттәр өсөн район мәҙәниәт йорто костюмеры Галина Мамыкина тегә. Беҙҙең конкурсыбыҙ 26 мартҡа тиклем дауам итә. Яратҡан театрығыҙ өсөн тауыш биреп өлгөрөгөҙ, дуҫтар!