Башҡортостан Республикаһы отчеты сиктәрендә республиканың Дәүләт Йыйылышы –Ҡоролтайҙа Башҡортостан Хөкүмәте Премьер-министры Андрей Назаров төбәктең конгресс потенциалын асыу һәм халыҡ-ара экспо-үҙәк проекты буйынса пландар тураһында һөйләне. - Башҡортостандың артабан үҫеше өсөн донъяның конгресс майҙансығы сифатында заманса инфраструктураны булдырыу мөһим. Уның үҙәге булып майҙаны 60 мең квадрат метрға тиң халыҡ-ара экспо-үҙәк проекты торасаҡ. Уның исеме - “Конгресс Тау”. Концептуаль яҡтан ул илдә иң яҡшыһы буласаҡ. Уны урынлаштырыу өсөн майҙансыҡ билдәләнгән, - тине Андрей Назаров. Андрей Назаров үҙенең сығышында Башҡортостандың һуңғы биш йылда сит илдәр менән хеҙмәттәшлеге тураһында ла һөйләне. -Тышҡы иҡтисади бәйләнештәр булдырғанда төп иғтибарҙы дуҫ илдәргә йүнәлтәбеҙ. Улар - Беларусь, Төркиә, Ҡаҙағстан, Үзбәкстан, Ҡытай. Улар менән эшләү өсөн республика вәкилдәре институты булдырҙыҡ. Һөҙөмтәлә берлектәге сауҙа күләме биш йыл эсендә 43 процентҡа артты. Тышҡы сауҙа әйләнешендә уларҙың өлөшө 22 процентҡа күбәйҙе. Быйыл бындай тәжрибәне Иран һәм Берләшкән Ғәрәп Әмирлектәре менән булдырасаҡбыҙ, - тине Андрей Назаров. 2023 йыл һөҙөмтәләре буйынса Башҡортостан 100-ҙән ашыу сит ил дәүләттәре менән бәйләнеш булдырған. Фото: Башҡортостан Хөкүмәте сайты.