Башҡортостан Башлығы Хакимиәте “Бәйләнештә”ге селтәрендә республикабыҙҙағы үҙгәрештәргә арналған рубрика асты. Бөгөнгө яҙма – Белорет районының Тирлән ауылы тураһында. 2018 йылда республика етәксеһенең тәүге эш сәфәрҙәренең береһе ошо яҡҡа төшә. Ауыл халҡы 1930 йылдарҙа уҡ төҙөлгән иҫке мәҙәниәт йорто тураһыда һөйләй. Ул заманса талаптарға яуап бирмәһә лә, тирләндәр уны ныҡ ярата. Радий Хәбиров күп функциялы мәҙәни үҙәк төҙөп ҡуйыу бурысын йөкмәтә. 2021 йылда объект төҙөлә башлай, ә инде былтыр, 2023 йылда, ул ишектәрен асты. Асыу тантанаһында видеобәйләнеш тәртибендә Башҡортостан Башлығы үҙе лә ҡатнашты. Ул тирләндәрҙе иҫтәлекле, мөһим ваҡиға айҡанлы ҡотланы һәм мәҙәни ял итер өсөн яңы мөмкинлектәрҙән файҙаланырға саҡырҙы. Яңы социаль-мәҙәни үҙәк – ул ижад, белем алыу һәм ял итеүгә тәғәйенләнгән заманса, уңайлы урын. 300 урынлыҡ тамаша залы, китапхана, түңәрәктәр өсөн айырым бүлмәләр, тренажер залы һәм башҡа уңайлыҡтары бар. Үҙәк “Мәҙәниәт” милли проектына (национальный проект “Культура”) ярашлы төҙөлдө. Тирлән халҡы яңы үҙәккә шатланып бөтә алмай. Ул ауылды биҙәп, төрлө йәштәге кешене үҙенә әйҙәп торған урынға әүерелде. Ғөмүмән, һуңғы биш йылда республикала мәҙәниәт тармағын үҫтереү буйынса ҙур эштәр атҡарылды. Һигеҙ яңы учреждение – ете ауыл клубы һәм бер балалар сәнғәт мәктәбе асылды. 86 мәҙәни объектҡа ремонт үткәрелде, улар иҫәбендә – 50 мәҙәни-ял үҙәге, 10 балалар сәнғәт мәктәбе, туғыҙ музей, ете китапхана, һигеҙ театр һәм концерт ойошмаһы, ике мәҙәниәт колледжы. Ошо яҡшы үҙгәрештәр арҡылы Башҡортостан халҡы мәҙәни сараларҙы заманса һәм уңайлы шарттарҙа ҡарай һәм ҡатнаша ала. Мәғлүмәт, фото: Башҡортостан Башлығы Хакимиәте – vk.com/glavbash