Премьер-министр кино сәнғәтенә бәйле һандарҙы атап үтте. Ватан фильмдарын төшөрөү үҫешә, сифатлы картиналар экранға сыға. Дүрт йыл эсендә ил Хөкүмәте кинематографҡа 36 миллиард һум аҡса йүнәлткән. Үткән йылда ғына ла Рәсәй кинотеатрҙары был сумманан күберәкте - 40 миллиард һум аҡса йыйған. Дәүләт булышлығында төшөрөлгән фильмдарҙы 57,5 миллион тамашасы ҡараған. Мәҙәниәт тармағының бар йүнәлештәренә лә ярҙам күрһәтеү дауам итә. Театрҙар йүнәтелә, музейҙар ремонтлана, яңылары асыла, күргәҙмә урындары булдырыла, китапхана фондтары тулыландырыла. Ауыл ерҙәрендә мәҙәниәт йорттары төҙөлә, яңыртыла. Тағы бер шатлыҡлы яңылыҡ: Президент ҡушыуы буйынса "Ауыл мәҙәниәт хеҙмәткәре" программаһы тормошҡа ашырыла башлай. Уға ярашлы, бәләкәй ауылдарға эшкә килгән хеҙмәткәрҙәргә аҡсалата ярҙам ҡарала. Әйткәндәй, Башҡортостанда бындай программа республика етәксеһе Радий Хәбиров башланғысы менән 2021 йылдан ғәмәлгә ашырылып килә. Уның буйынса бихисап йәш мәҙәниәт хеҙмәткәрҙәре ярҙам алды ла инде. Киләһе йылдан инде программа тотош илдә бойомға ашырыла башлай. Хәйбулла район мәҙәниәт йорто директоры Илүзә Кәримова был ҡыуаныслы яңылыҡҡа ҡарата фекерҙәре менән уртаҡлашты. – “Ауыл мәҙәниәт хеҙмәткәре” программаһы 2021 йылдан Башҡортостан Республикаһы Башлығы Радий Хәбиров инициативаһы буйынса тормошҡа ашырыла башланы. Уға ярашлы, беҙ ике йәш белгесебеҙгә - 2021 йылда ҡурайсы Рифат Күскилдин һәм 2022 йылда вокалист Мария Голубцоваға ярҙам күрһәттек. Улар 500 мең һум күләмендә компенсация түләүҙәре алды һәм уны торлаҡ шарттарын яҡшыртыуға йүнәлтте. Йәш, талантлы, көслө белгестәребеҙ бөгөн, Хәйбулла районы тамашасыларын ҡыуандырып, уңышлы ғына эшләп килә. Кисә ил Хөкүмәте Премьер-министры Михаил Мишустиндың Дәүләт Думаһына отчеты ваҡытында РФ Президенты Владимир Путин ҡушыуы буйынса 2025 йылда “Ауыл мәҙәниәт хеҙмәткәре”нең федераль программаға әйләнеп, тотош илдә башланыуы тураһында ишетеп бик ҡыуандыҡ, сөнки бының районыбыҙға йәш белгестәр йәлеп итергә ярҙам итере билдәле. Был мәҙәниәт хеҙмәткәренең абруйын күтәрергә, кадрҙар проблемаһын тулыһынса хәл итергә булышлыҡ ҡылыр, тигән өмөттәбеҙ. Һүрәттәрҙә: Илүзә Кәримова; "Ауыл мәҙәниәт хеҙмәткәре" республика программаһы буйынса ярҙам алған йәш белгестәр – Рифат Күскилдин, Мария Голубцова. Фотолар – шәхси, Аҡъяр мәҙәниәт һарайы архивтарынан.