Рәсәй Хөкүмәт Премьер-министры Михаил Мишустин Хөкүмәт эшмәкәрлеге буйынса отчетында илдә инфраструктураны үҫтереү бурысына айырым туҡталып, уның тормош сифаты нигеҙе икәнен билдәләне. Төҙөлөш тармағы йыл һайын һигеҙ процентҡа яҡын үҫеш бирә. Ул – ил үҫешенең драйверы, тип билдәләне етәксе. Былтыр илдә 110 миллион квадрат метр майҙанда торлаҡ төҙөлгән. Был – Рәсәй тарихында рекордлы күрһәткес. “4,5 миллион ғаилә йәшәү шарттарын яҡшыртты”, тип хәбәр итте Премьер-министр. Тағы бер мөһим мәсьәләгә иғтибар йүнәлтте етәксе: былтыр авария хәлендәге тораҡтарҙан 200 меңгә яҡын кеше яңы фатирҙарға күскән. Ә дүрт йылда – 670 мең кеше! Торлаҡ ҡына түгел, уның янындағы урындар, урамдар, яр буйҙары шулай уҡ йәмле, халыҡҡа уңайлы булырға тейеш. Былтыр 10 меңдән ашыу ихата һәм йәмәғәт киңлектәре ҙур үҙгәреш кисергән, ә профилле федераль проектҡа ярашлы, халыҡтың теләген иҫәпкә алып, 65 меңдән ашыу йәмәғәт урыны тәртипкә килтерелгән. Хәлим ХӨРМӘТУЛЛИН, Өфө ҡалаһының Затон биҫтәһендә йәшәүсе: - Бығаса беҙҙең Затон биҫтәһен халыҡтың күҙен ҡыҙыҡтырырлыҡ район тип иҫәпләп булмай ине. Әммә һуңғы осорҙа уның танымаҫлыҡ булып үҙгәреренә өмөт ҙур. Бөгөн иҫке барактарҙы һүтеү, халыҡты яңы фатирҙарға күсереү әүҙем бара. “Тулҡын” паркы төҙөкләндерелеп, бына тигән ял итеү урынына әүерелде. "Ағиҙел аръяғы" тип йөрөтөлгән биләмәлә торлаҡ төҙөлөшө киләсәктә төп йүнәлеш буласаҡ. Бында туғыҙ миллион квадрат метр майҙанда торлаҡ төҙөү планлаштырыла – тотош ҡала тигән һүҙ! Уңайлы, матур йорттар менән бергә балалар баҡсалары, мәктәптәр, социаль объекттар ҡалҡып сығырына, халыҡтың тормош шарттары яҡшырырына өмөтләнәбеҙ! БЕЛЕШМӘ. Башҡортостанда былтыр 3,3 миллион квадрат метр торлаҡ файҙаланыуға тапшырылды. Был 2022 йыл менән сағыштырғанда 8,3 процентҡа күберәк, тип хәбәр итә Росстат. Шулай итеп, республика өсөнсө йыл рәттән торлаҡты сафҡа индереү буйынса рекордты яңырта. Фото: Өфө ҡала хакимиәте.