Баҡалы районының Ҡуштирәк ауылында, “Һаулыҡ һаҡлау” милли проектының тәүге звеноны яңыртыу программаһына ярашлы, яңы фельдшер-акушерлыҡ пункты асылды. Тантаналы сараға ауыл халҡы, Баҡалы район дауаханаһы хеҙмәткәрҙәре йыйылды. Район хакимиәте башлығы урынбаҫары Ринат Дәүләтов һәм үҙәк район дауаханаһының баш табибы Зәбир Ғиздәтуллин яҡташтарын яңы медицина пункты асылыуы менән ҡотланы. Тәүге медик-санитар ярҙамын бында Ҡуштирәк һәм Яңы Һаҫыҡкүл ауылдары халҡы аласаҡ. Район үҙәгенән 30 километрҙа урынлашҡанлыҡтан, ауылдаштар медицина пункты асылыуын күптән түҙемһеҙлек менән көтә ине. Халыҡты тәжрибәле фельдшер Гөлназ Ғәзизова хеҙмәтләндерәсәк. –Яңы бинала пациенттар өсөн дә, персонал өсөн дә уңайлы шарттар булдырылған. Фельдшер һәм акушер бүлмәләре бар, процедура-прививка кабинеттары, дарыуҙарҙы һаҡлау өсөн бүлмә булдырылған, – тип билдәләне баш табип Зәбир Ғиздәтуллин. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығының матбуғат хеҙмәте.