"Береһе – тере!"

Өфөлә 14 йәшлек Дамир Әҙеһәмов менән 13 йәшлек Павел Паличевтың ғәйеп булыуына етенсе көн китте. Уларҙы йөҙәрләгән ирекмән ер өҫтөнән дә, күктән дә, һыу аҫтынан да эҙләй. Әммә ошоға тиклем эҙҙәренә төшә алманылар. Малайҙарҙың береһенең итеге һыуҙа табылғас, улар батҡандыр тигән фараз бар, тик водолаздар эҙләүе лә ошоға тиклем һөҙөмтә бирмәне. Малайҙар табылмағас, ҡайһы бер кешеләр экстрасенстарға мөрәжәғәт итеп ҡарарға кәңәш итә ине. “Уфа1” порталы бына эшләгән һәм Өфө экстрасенсы Михаил Сафинға мөрәжәғәт итеп, уның фекерен белешкән. Ир үҙенең фаразы бик дөрөҫ булмауы ихтимал тигән, сөнки юғалған кешеләрҙе эҙләү уның йүнәлеше түгел, тик балалар хаҡына, ярҙам итеп ҡарарға тырышҡан. Михаил малайҙарға таныш булған ир менән ҡатын образын күрәм тигән. Ҡатынды өлкән йәштәге ҡара сәсле кеше тип һүрәтләгән. Уныңса, был ҡатын малайҙарҙың бергә мәктәпкә йөрөгән таныштарының әсәһе булыуы ихтимал. Уның шизофрения менән сирләүе ихтимал. Ир кеше иһә хәрбигә оҡшаған. Экстрасенс әйтеүенсә, ир менән ҡатын малайҙар уҡыған мәктәпкә бәйле булыуы бар. – Улар тереме, юҡмы икәнлеген аныҡ ҡына әйтә алмайым. Дөйөм әйткәндә, береһе ныҡлы тере булып күренә, икенсеһе – юҡ. Ҡурҡыу хисе килә. Тик ҡайһыныһы иҫән, ҡайһыныһы юҡ икәнлеген әйтә алмайым, – тигән Михаил. Артабан экстрасенстың күҙ алдына йылғаға яҡын урынлашҡан аҡ туғыҙ ҡатлы йорттар баҫҡан. Һиҙемләүе менән ул ташландыҡ йорттарға табан барған, айырыуса мөгәрәптәре булғандарына. Иҫән малайҙың ҡайҙа булыуы ихтимал тигән һорауға Михаил, тимер юлдары булыуы бар тигән. Уныңса малайҙарҙы Өфө эсендә түгел, ә яҡын тирә-яҡта, ташландыҡ заводтар йәки тораҡ йорттар булған урындан эҙләргә кәрәк. – Аҡ бина, емерек, тәҙрәһеҙ. Йыраҡ түгел ерҙә кешеләр йөрөй, төпкөл урын түгел. Ҡайҙа икәнлеген аныҡ әйтә алмайым, яҡынса ҡаланан төньяҡтан сыҡҡан ерҙә, промзона тирәһендә кеүек, – тигән Михаил. Был фараздарға ышанырғамы-юҡмы, һәр кемдең үҙенең эше. Тик мөғжизә булып, улар иҫән-һау табылһын ине тигән теләк һәр кемдә бик көслө. Фото: "Уфа1"