Баҡалы район мәҙәниәт һарайының Нәжиб Асанбаев исемендәге халыҡ татар театры 1982 йылдан уңышлы эшләй, район мәҙәниәт һарайы эшмәкәрлегендә алдынғы урынды биләй. Уның үҫешенә етәксеһе Илгизәр Хөсәйенов тос өлөш индерә – 1998 йылдан коллектив етәксеһе булып тора. Ул етәкселек иткән осорҙа –2012 йылда театрға “халыҡ театры” исеме бирелә. Коллектив етәксеһе һәм уның ағзалары тамашасының ихтыяжын аңлап, рухи ихтыяждарын иҫәпкә алып, үҙ эшмәкәрлеген алып бара. Бындай урында тап ошондай кәрәкле үҙешмәкәр коллектив ҡына емешле эшләй ала. Район саралары коллектив ҡатнашлығынан тыш үтмәй. Артистар Еңеү байрамы, Һабантуй, Яңы йыл театрлаштырылған тамашалары, юбилей сараларында ҡатнаша. Коллективтың репертуары бай: актерҙарҙың сығышы ла, ҡурсаҡ театры ла бар. Театрҙа бик күп спектаклдәр ҡуйылған, Мәҫәлән: Венера Хәкимованың “Беренсе һәм һуңғы мөхәббәт”, Наил Ғәйетбаевтың “Әстәғәфирулла” комедияһы, Ибраһим Абдуллиндың “Айһылыуҙың айлы кистәре”, Нәжиб Асанбаевтың “Һыу юлы”, Назар Нәжмиҙаң “Гармунсы дуҫ” һәм башҡалар. 2022 йылда, 17 – 18 ноябрҙә, коллектив Кушнаренко районында уҙған “Театр рампаһы” республика һәүәҫкәр театрҙар фестивалендә ҡатнашты. Фестивалдә коллектив, жюри хөкөмөнә Ғамир Насрыйҙың “Йәшел эшләпә” спектаклен күрһәтеп, гран-при яулай. Музыкаль спектакль бик ҡыҙыҡлы булған. Сағыу костюмдар, матур декорациялар һәм актерҙарҙың виртуоз уйнауы тамашасыларҙы театр хәрәкәтенә йәлеп итеп, постановканың төп идеяһын бик яҡшы сағылдыра. Театрҙың уңышы етәксенең эшмәкәрлегенә бәйле һәм Илгизәр Хөсәйенов был йәһәттән һынатмай, һөнәренә тоғро ҡала һәм яңынан-яңы спектаклдәр тамашасыға тәҡдим итеп тора. Ул әлеге ваҡытта “Башҡортостан” гәзите яҡынлашып килгән Халыҡ-ара театрҙар көнө уңайынан ойошторған “Халыҡ таланттары” конкурсында ла ҡатнаша. Уңыштар теләйбеҙ. Фото: Илгизәр Хөсәйеновтың ғаилә альбомынан.