Радий Хәбиров "Ирҙәрсә һөйләшеү" форумында йәштәр менән осрашты

Ул үҙе өсөн мөһим, иҫтәлекле көндә - юбилейын билдәләгәндә мәктәп уҡыусылары менән күрешеүҙең быуындар күсәгилешлеге өсөн ниндәй мөһим икәнен төшөнөргә айырыуса ярҙам итеүен билдәләне. Үҫмерҙәрҙең береһе республика Башлығының ҡайҙа хеҙмәт иткәне һәм хеҙмәттәштәре менән әле лә аралашамы икәне менән ҡыҙыҡһынды. Радий Хәбиров 1982-1984 йылдарҙа әрмелә булыуы, Байкал аръяғы хәрби округында мотоуҡсылар дивизияһында хеҙмәт итеүе хаҡында һөйләне. "Хеҙмәттәштәрем менән йыл һайын осрашып торорға һүҙ ҡуйышҡайныҡ, әммә тормош ҡатмарлыраҡ - ул беҙҙе бөтә Советтар Союзы буйлап таратты һәм бәйләнеш өҙөлдө. Ике хеҙмәттәшем менән тығыҙ аралашабыҙ", - тип яуап бирҙе ул. Шулай уҡ республиканан МХО-ла ҡатнашҡан хәрбиҙәргә һәм уларҙың ғаиләләренә ҡаралған ярҙам саралары тураһында ла һорау булды. Республика етәксеһе, ундай ярҙамдың иң мөһим мәсьәләләр рәтендә икәнен айырып билдәләне, ғаиләләргә ярҙам саралары тураһында аңлатып үтте. "Республикала 39 төрлө ярҙам сараһы ҡаралған. МХО яугирҙәренең балалары мәктәптә бушлай туҡлана һәм йәмәғәт транспортында бушлай йөрөй ала, уҡыу йорттарына ингәндә льготалар ҡаралған, башҡа төр ярҙам да бар. Башҡортостанда "Ватан һаҡсылары" фонды эшләй, ә район-ҡалаларҙа яугирҙәрҙең ғаиләләренә ярҙам итеү механизмдары яйға һалынған", - тине ул. Республика етәксеһе махсус хәрби операция тамамланғас өйгә ҡайтҡан яугирҙәрҙең республиканың һәм Рәсәйҙең киләсәген төҙөрө хаҡында ла һөйләне. "Уларҙы етәксе вазифаларға ҡуйырға тырышасаҡбыҙ, - тине ул. - Улар ҡурҡмайынса илде һаҡларға китте, шулай булғас, уның үҫешен дә дауам итә алырҙар". Артабан Башҡортостан Башлығы "Патриот" паркында бөтә эштәр тамамланғас, уның ниндәй булыры тураһында ла бәйән итте. Үҫмерҙәр хәрби мәҙәниәттең, хәрби-патриотик эштәрҙең үҫеше менән дә ҡыҙыҡһынды. Уның өсөн кем ысын герой, тигән һорауға Радий Хәбиров, иң беренсе - махсус хәрби операцияла ҡатнашыусылар, тип яуап бирҙе. Йәш быуын вәкилдәрен республикалағы социаль-иҡтисади мәсьәләләр ҙә ҡыҙыҡһындырҙы. Мәҫәлән, Нуғай ауылында мәктәп төҙөү, Өфөнөң 450 йыллығына, Ғаилә йылына арналған байрам саралары тураһында. Нуғайҙа йыл башында яңы поликлиника сафҡа индерелде һәм эш башланы. 2026 йылда мәктәп төҙөлә башларға тейеш, артабан физкультура-һауыҡтырыу комплексы төҙөү ҙә ҡарала. Ғаилә йылына арнап төрлө тематик форумдар, фестивалдәр, күргәҙмәләр үткәреү планлаштырыла. Осрашыу аҙағында республика етәксеһе уҡыусыларға файҙалы диалог өсөн рәхмәт әйтте, "Патриот" паркы офицерҙарына, хеҙмәткәрҙәренә лә үҫмер йәштәргә яҡшы әҙерлек биргәндәре, тәрбиә һабаҡтары өсөн рәхмәт белдерҙе. "Батырҙар ярышы"нда еңеүселәргә бүләктәр ҙә тапшырҙы. Сығанаҡ, фото: glavarb.ru/rus/press_serv/novosti/176157.html