Найти тему
Башҡортостан гәзите

"Патриот"та хәлдәр нисек?

Бөгөн Башҡортостан Башлығы Радий Хәбиров Рәсәй Геройы Максим Серафимов исемендәге “Патриот” хәрби-патриотик паркында булды. Бында 19-нан 21 мартҡа тиклем “Ирҙәрсә һөйләшеү” республика йәштәр патриотик фестивале үтә. Етәксе 8-се һәм 10-сы кластарҙа уҡыған 250 курсант менән иртәнге зарядкала ҡатнашты. Курсанттар араһында МХО-ла ҡатнашыусылар балалары, кадеттар һәм юнармеецтар бар. – Бөгөн һеҙҙе сағыу, тәьҫораттарға бай көн көтә. Беҙ “Ирҙәрсә һөйләшеү” форумында ҡатнашабыҙ. Паркыбыҙ Рәсәй Геройы Максим Серафимовтың исемен йөрөтә, ул 2022 йылдың 25 февралендә илебеҙҙе һаҡлап батырҙарса һәләк булды. Уның атаһы Владимир Серафимов бөгөн беҙҙең менән. Бында бөгөн бөтә республиканан тиерлек мәктәп уҡыусылары йыйылды. Арағыҙҙа атайҙары ҡорал тотоп яуҙа булғандар ҙа, унда һәләк булғандарҙың улдары ла бар, – тине ул һәм бер минут тынлыҡ менән һәләк булған хәрбиҙәрҙе иҫкә алдылар. Радий Фәрит улы үҫмерҙәргә “Ирҙәрсә һөйләшеү” проектының асылы тураһында һөйләне. Өс көн эсендә ысын ар-аттар малайҙарға бик ҡәҙерле кәңәштәр бирер тигән ышаныс белдерҙе ул. Парк плацында йәш курсанттар республика етәксеһе менән бергә зарядка яһаны. Шулай уҡ ҡунаҡтар ҙа саҡырылды. Улар араһында Афған һуғышы геройҙары, билдәле спортсылар, артистар ҙа булды. Форум сиктәрендә “Патриот” паркында “Батырҙар ярышы” ҡышҡы уйындары ла үтте. Ярыштар башланғансы Радий Фәрит улы курсанттарҙың нисек туҡланыуын тикшереп, бергә иртәнге ашты ашаны. Егеттәрҙең биш тапҡыр тулы туҡланыуын һәйбәт күренеш тип атаны. Былтыр бында 250 урынлыҡ ҙур ашхана асылғайны. Шулай уҡ Радий Хәбиров яңы физкультура-һауыҡтырыу комплексын ҡараны. Уны быйыл файҙаланыуға тапшыралар. Төбәк етәксеһе комплекс менән Шишмә районының яҡындағы ауылдар кешеләре лә файҙалана аласаҡ тине. Киләсәктә унда бассейн төҙөләсәк. – “Патриот” паркы үҫешә. Былтыр бында 15 мең кеше уҡыу-хәрби сбор үтте. Быйылға ла буш урындар ҡалмаған тиерлек. Апрелдә мин бында мәктәптәрҙең патриотик тәрбиә буйынса кәңәшселәре менән осрашасаҡмын. Шулай уҡ паркта “Геосаҡырыу” халыҡ-ара геологик чемпионаты үтәсәк. Беҙ “Патриот”ты үҫтереүҙең икенсе сиратын тамамлайбыҙ. Ә бөтәһе дүрт этап булыр тип көтөлә. Рәсәй Оборона министрлығы беҙгә 200 гектар ер бирҙе, тимәк, эш күп йылдарға етерлек буласаҡ, – тине ул. “Батырҙар ярышы” башланыр алдынан парк өҫтөнән самолеттарҙың пилотаж төркөмдәре осоп үтте, унан парашютсылар төштө. Радий Хәбиров спорт ярышын ҡараны. Курсанттар сәпкә тура атыу, тактик, физик, хәрби-медицина һәм ут әҙерлеген күрһәтте. Бынан тыш, программала радиация, химик һәм биологик һаҡланыуға тестар, парашюттан һикереү булды. Радий Фәрит улы малайҙар менән бегә Калашников автоматын һүтеп-йыйҙы һәм гер күтәрҙе. Республика етәксеһе парк биләмәһенә килтерелгән трофей хәрби техниканы ҡараны. Бында МХО биләмәһенән ВСУ-ның емерелгән өс танкы ҡуйылған. – Беҙ үҙебеҙҙең батальондар һәм “Башҡортостан” полкынан мөмкинлек булғанда республикаға трофей техниканы ебәреүҙе һораныҡ. Паркта махсус майҙансыҡ эшләйәсәкбеҙ, беҙҙең егеттәрҙең нисек һуғышҡанын барыһы ла күреп торорға тейеш. Емерелгән машиналарҙың тәүге өлгөләре бар ҙа инде. Ҡайһы берәүҙәрен яу яланынан алып сығыуы еңел түгел. Тик егеттәр нимә ул армия, нимә ул һуғыш икәнлеген күреп үҫергә тейеш. Һәм, әлбиттә, бөтәбеҙ бергә еңеүгә ынтылабыҙ, – тине ул. Фото: Башҡортостан Башлығы сайты.