Баш ҡалала йәшәгән ҡатын мутлашыусылар шылтыратҡанына ышанып, фатирын һатып ебәргән һәм бер нисә кредит алған. Баҡтиһәң, ғинуар аҙағында 51 йәшлек ҡатынға шылтыратып, сим-картаһының ғәмәлдә булыу ваҡытын оҙайтырға кәрәклеген хәбәр иткәндәр. Бының өсөн уға смс-тағы кодты әйтергә кәрәк булған. Мутлашыусыларҙың әйткәнен үтәгәс, ир телефонын һалған. Артабан ҡатынға “Дәүләт хеҙмәттәре” порталының “белгесе” шылтыратып, уның шәхси кабинетындағы мәғлүмәттәр мутлашыусыларҙың ҡулына эләгеүе тураһында һәм шуға ла уның менән Рәсәй банкы хеҙмәткәре бәйләнешкә сығасағын хәбәр иткән. Банк “хеҙмәткәре” ҡатындың исеменә кредит рәсмиләштерергә маташҡандары тураһында һөйләп, бар аҡсаһын хәүефһеҙ иҫәпкә күсерергә ҡушҡан. Һөҙөмтәлә мутлашыусыларға ышанған ҡатын фатирын һатып, бөтә булған аҡсаһын күсергән һәм өҫтәүенә бер нисә кредит та алған. Зыян 11 миллион һумдан ашыу тәшкил иткән. Был факт буйынса ”мутлашыу” статьяһы буйынса енәйәт эше ҡуҙғатылған. Автор фотоһы.