Районда махсус хәрби операцияла ҡатнашыусы яугирҙарға ярҙам итеү маҡсатында әле был, әле икенсе ауылда бергәләп маскировкалау селтәрҙәре үрәләр, окоп шәмдәре яһайҙар, һалма йәйәләр, ойоҡ-бейәләйҙәр бәйләйҙәр, аҡса йыйып ир-егеттәргә кәрәкле әйберҙәр алып оҙаталар. Һәр кем был изге эшкә үҙ өлөшөн индерергә тырыша. Шул иҫәптән Таштуғай ауылы халҡы ла яҡташ яугирҙарға ярҙам итеү эшен әүҙем алып бара.
Улар былтыр көҙҙән ошо көнгәсә 19 маскировкалау селтәрен үреп ебәргән. Был турала беҙгә ауыл старостаһы Зөлфирә Рахманғолова мәғлүмәт бирҙе.
-Махсус хәрби операцияла ҡатнашыусы яугирҙарға ярҙам итеү маҡсатында былтыр көҙ ауыл халҡы менән әүҙем маскировкалау селтәрҙәрен үрә башланыҡ. Тормош иптәшем селтәр үреү өсөн махсус станок ҡороп бирҙе. Ауылыбыҙ чатына яҙғайным, ауыл халҡы хуплап, селтәр үреүгә дәррәү йөрөй башланы. Ирекмәндәр Таңсулпан Купцова һәм ауылыбыҙ килене Зилә Кәримова материал алып килеп, селтәр үреү буйынса оҫталыҡ класы күрһәттеләр. Ауылыбыҙ ҡатын-ҡыҙҙары тиҙ генә өйрәнеп алып, әүҙем эшкә тотондолар. Былтыр көҙҙән ошо көнгәсә 19 маскировкалау селтәре үреп, яугирҙарға ебәрҙек. Бынан тыш, күмәкләп аҡса йыйып, йөн һатып алып, ирекмәндәр ҙә пряжа биреп яугирҙаға 70 пар бейәләй, 9 пар йылы носки бәйләнек, уларға өҫтәп тәмәке, башҡа бүләк-күстәнәстәр һалып гуманитар ылау менән оҙаттыҡ. Зөһрә Латыпова, яугирҙың әсәһе Гөлсөм Кәримова, Линиза Ишемғолова, Гөлъямал Рахманғолова, Гөлсөм Бисенбаева, Флүзә Әбделмәнова, Рузилә Үтәшева, Зөлфиә Салауатова, Гөлйемеш Рахманғолова бер ҡалдырмай йөрөй. Ғөмүмән, бөтә ҡатын-ҡыҙҙар ҙа әүҙем йөрөйҙәр. Күмәгәйгәс Мәмбәт ауылынан Фидель Солтанов беҙгә тағы бер станок ҡороп бирҙе. Хәҙер ике станокта үрәбеҙ. Рәхим Собханғолов иһә тауар ҡырҡыу өсөн станок эшләп бирҙе. Клуб хеҙмәткәре Маһинур Үтәшева барлыҡ эштәребеҙҙе социаль селтәрҙә яҡтыртып бара. Ирекмәндәр менән даими бәйләнештәбеҙ. Уларҙың һорауы буйынса 23 февраль алдынан ауылыбыҙҙың 30 хужабикәһе һалма йәйеп тапшырҙы. Яугирыбыҙҙың бер туған ағаһы Кәрим Мәжитов ике баш һарыҡ һуйып бирҙе. Гөлсөм Бисенбаева 5 кг фарш ебәрҙе. Көҙ көнө ауылдаштарыбыҙ, пенсионерҙар 21 мең 500 һум аҡса йыйып биргәйне. Үткән айҙа ла пенсионерҙар 6400 һум аҡса йыйҙылар. Ғөмүмән улар ныҡ ярҙам итәләр. Ай һайын һәр пенсияларынан егеттәргә ярҙамға тип өлөш сығаралар. Тағы ла мәсетебеҙ дөйөм 13 мең һум аҡса бирҙе. Халыҡ йыйған аҡсаны ирекмәндәргә тапшырып торам, улар яугирҙарға кәрәкле әйберҙәр ала. Артабан да был эштәрҙе дауам итәсәкбеҙ. Ауылыбыҙ ҡатын-ҡыҙҙары үҙҙәре үк ярҙам итергә ашҡынып тора, шуның өсөн барыһына ла рәхмәтлемен. Эшкә йөрөгән кеүек яуаплы ҡарайҙар.
Беҙҙең ауылдан да өс яугир бар. Беҙ уларға һәр яҡлап ярҙам итергә тейешбеҙ, тип уйлайым. Иң мөһиме, тиҙерәк хәрби операция тамамланып, илдәр тынысланһын, ир-егеттәр тыуған яғына имен-һау әйләнеп ҡайтһын, - тине Зөлфирә Рахманғолова.
Яугирҙарға гуманитар ярҙам күрһәтеүгә ҙур өлөш индергән Таштуғай ауылы халҡына афарин тиергә генә ҡала.
Рәзилә Байғусҡарова.