Уйландырған да, моңландырған да һин – “Илһам”!

Тәтешле театрына 1970 йылда ижади ҡаҙаныштары өсөн Башҡортостан Мәҙәниәт министрлығы бойороғо менән “халыҡ” исеме бирелә. Был маҡтаулы исемде алғандан һуң театр яңы һулыш менән илһамланып ижад итә башлай. Коллективта төрлө йылдарҙа Надиә Ғәлиева, Фирдүс Зарипов, Архам Шарыгин, Вахит Нуриханов, Фәрит Йыһангиров, Ася Коркина кеүек режиссерҙар спектаклдәр ҡуя. Әлеге көндә “Илһам” халыҡ татар театры режиссер, Башҡортостандың атҡаҙанған артисы, Рәсәй театр эшмәкәрҙәре союзы ағзаһы Венер Юрис улы Хәкимов етәкселегендә ижад ҡаҙанында ҡайнап, яңы бейеклектәр яулай. Былтыр “Илһам” татар халыҡ театры Рәсәйҙең атҡаҙанған артисы, Башҡортостандың атҡаҙанған сәнғәт эшмәкәре Тимербулат Имашевтың 115 йыллығына арналған ауыл үҙешмәкәр театрҙарының зона фестиваленән наградалар менән ҡайтты. Роберт Батулла әҫәре буйынса ҡуйылған “Кисер мине, әсәй!” спектакле ижади коллективтың тағы бер уңышлы аҙымы булды. ...Тетрәндергес тә, уйландырғыс та тормош сәхнәлә дауам итә, тәүге минуттан уҡ ябай булмаған ғаилә мөнәсәбәттәре һине ошо мөхиткә алып инеп китә, өлкәндәр өсөн дә, балалар өсөн дә һабаҡ булырлыҡ әҫәр. Актерҙарҙың образдарын бирелеп китеп уйнауынан әҫәрләнгән тамашасыларҙың аяғөҫтө баҫып, дәррәү ҡул сабып, уларға ихтирам күрһәтеүе - сәхнәлә ғәжәп тамашаны тыуҙырған хеҙмәткәрҙәргә оло рәхмәт билдәһе. Спектаклдә ролдәрҙе Арлиан Ғәбделхаҡов, Гөлшат Шәбутдинова, Фәрит Зыянгиров, Зинира Туҡаева, Илшат Ҡыямов, Венер Хәкимов, Эльвира Саҙретдинова, Әминә Әхмәтйәнова башҡара. Буласаҡ режиссер һәм актер Венер Хәкимов Борай районының Бустанай ауылында тыуып үҫкән. Ҡуҙыбай урта мәктәбен тамамлағас, хеҙмәт юлын Салауат башҡорт драма театрында реквизитор булып башлай. Театрҙың баш режиссеры Әнүәр Нурмөхәмәтов егеттең театр менән ҡыҙыҡһыныуын тойоп, уны М.Ғафуриҙың “Ҡара йөҙҙәр” спектаклендә ҡатнашырға саҡыра. Венер Хәкимов бер үк ваҡытта Салауат медицина училищеһын, ә 1984 йылда Стәрлетамаҡ мәҙәниәт техникумын тамамлай. Диплом алыу менән Салауат башҡорт театрында актер булып эшкә тотона. Венер Юрис улы артабан белемен арттырыу уйы менән Ҡазан мәҙәниәт һәм сәнғәт академияһының театр бүлегенә уҡырға инә. Шул йылдарҙа сценарийҙар, пьесалар, көләмәстәр яҙа башлай. 1975 - 1995 йылдарҙа Салауат башҡорт дәүләт драма театрында актер һәм постановка бүлеге мөдире булып эшләй. Аҙаҡ Стәрлетамаҡ мәҙәниәт техникумына режиссер-педагог булараҡ күсерәләр. Мәҙәниәт министрлығы 2009 йылда уны Нефтекама дәүләт филармонияһына режиссер-ҡуйыусы итеп эшкә ебәрә. Ғөмүмән, Венер Юрис улы ошоғаса ижадтан, сәхнәнән илһам, дәрт алып, сәнғәт юлынан тайпылмай эшләүен дауам итә. Театр сәхнәләрендә ҡуйылған пьесаларынан тыш, сатира-юмор жанрында яҙылған әҫәрҙәре бөгөн дә көнүҙәклеген юғалтмай. Улар араһында “Көндәлек”, “Кемгә кәрәк ул сәләмәтлек?”, ”Ғәҙәттә, беҙ, ирҙәр...”, “Балалар хәсрәте”, “Туйҙан ҡайтып киләм!”, “Абдулла ҡарт хәтирәләре” һәм башҡа пьесалары бар. Ижадынан ғына түгел, өс бала тәрбиәләп үҫтергән оло ғаиләһенән, бер ҡосаҡ ейән һәм ейәнсәрҙәренән көс алып, шатлыҡ кисереп йәшәй “Илһам” халыҡ татар театры етәксеһе Венер Юрис улы Хәкимов. Беҙ уға тағы ла олораҡ ижади уңыштар, яңы үрҙәр теләйбеҙ! 27 март – Бөтә донъя театр көнө. Беҙҙең дәртле халҡыбыҙ – һәр яҡлап талантлы, театр сәнғәтен дә үҙ күрә, спектаклдәрҙе яратып ҡарай. Һөнәри байрам көнө уңайынан республикабыҙҙың төрлө тарафтарында гөрләтеп ижад итеп килгән 27 халыҡ театры араһында “Халыҡ таланттары” тигән конкурс иғлан иттек. Коллективтар менән уларҙың етәкселәре аша таныштырабыҙ. Хөрмәтле дуҫтар, һеҙҙең дә конкурста әүҙем ҡатнашыуығыҙҙы, бәйгелә ҡатнашыусыны дәртләндереп, уның өсөн тауыш биреүегеҙҙе, лайктар ҡуйыуығыҙҙы көтәбеҙ! Улар быға лайыҡ! Фото: шәхси һәм театр архивынан.