Найти тему
Башҡортостан гәзите

Ҙур ауыл хужалығы күргәҙмәһе асыла

Өфөлә “Башинформ” мәғлүмәт агентлығында 26 мартта башланасаҡ Агросәнәғәт форумына һәм 34-се “Агрокомплекс” халыҡ-ара махсуслашҡан күргәҙмәгә әҙерлек мәсьәләләренә арналған матбуғат конференцияһы уҙҙы. Унда Башҡортостан Хөкүмәте Премьер-министры урынбаҫары – ауыл хужалығы министры Илшат Фәзрахманов һәм Башҡортостан күргәҙмәләр компанияһының генераль директоры Альбина Килдеғолова республиканың үҙәк матбуғаты саралары журналистары һорауҙарына яуап бирҙе. – Быйыл күргәҙмә башҡа йылдағы сараларҙан ҡырҡа айырыласаҡ. Традицион экспозициялар менән бергә беҙҙең төбәк өсөн үҙенсәлекле онлайн-платформа ойоштороласаҡ, ул майҙанда барған хәл-ваҡиғаларҙы онлайн режимында ҡарау мөмкинлеген генә тыуҙырып ҡалмаясаҡ, ә донъяның төрлө мөйөштәренән күргәҙмәлә ҡатнашыусылар менән тура аралашыу мөмкинлеген дә бирәсәк, – тине Альбина Килдеғолова. Белеүебеҙсә, “Агрокомплекс” күргәҙмәһе Өфөлә инде 34-се тапҡыр үткәрелә. Быйыл 18 мең квадрат метр майҙанда – биш күргәҙмә комплексы майҙансығында Рәсәйҙең 40 төбәгенән 360 компания ҡатнашасаҡ. Шулай уҡ Чехия, Венгрия, Беларусь Республикаһы кеүек сит илдәрҙең компаниялары һәм вәкилдәре киләсәк. Ә инде Красноярск крайы менән Мари Иле Республикаһы стендтарын күрһәтәсәк. Күргәҙмәләр комплексы алдындағы майҙанда 180 берәмек техника һәм ҙур күләмле ҡоролма экспозицияһы ҡуйылған күргәҙмә ойоштороласаҡ. Унда ауыл хужалығы техникаһы һәм комплекттарын етештереүселәр, ветеринария һәм малсылыҡ, үҫемлекселек, ауыл хужалығы тауарын етештереү, агрохимия, ауыл хужалығы комплексы предприятиеларына хеҙмәт күрһәтеү кеүек йүнәлештә махсуслашҡан компаниялар ҙа ҡатнаша. “Агрокомплекс” күргәҙмәһе барышында фермерҙар етештергән аҙыҡ-түлек йәрминкәһе лә ойоштороласаҡ. Форумда эшлекле программа планлаштырылған. Унда “Ауыл хужалығы комплексының яңы ысынбарлығы: трасформация, һанлаштырыу, кооперация” стратегик сессия төп ваҡиға буласаҡ. Күргәҙмә барышында 25 тармаҡ сараһы ойоштороу ҡаралған, шул иҫәптән ауыл хужалығында һанлы технологияларҙы индереү, ауыл сәнәғәте кластерын үҫтереү, бәләкәй формала хужалыҡ алып барған предприятиеларҙа кластерҙы һәм кооперацияны үҫтереү, тармаҡты техник һәм технологик яҡтан яңыртыу һәм башҡа башҡа йүнәлештәр буйынса секциялар, түңәрәк өҫтәлдәр уҙасаҡ. Фото: Айрат Нурмөхәмәтов.