Үҫештәре иҫ киткес!

18 мартта аҙна һайын уҙғарылған оператив кәңәшмәлә “Благовещен күпер тимер-бетон конструкциялар заводы”ның 2023 йылдағы эш йомғаҡтары тикшерелде. Предприятиеның генераль директоры Дмитрий Исаев хәбәр итеүенсә, завод “Благовещен” йылдам социаль-иҡтисади үҫеш биләмәһе резиденты булып тора һәм күперҙәр төҙөү, юл төҙөлөшө, инфраструктураны үҫтереү өсөн йыйылма тимер-бетон конструкциялар етештереү менән шөғөлләнә. Етештереү урыны булдырыу буйынса инвестиция проекты 2020 йылда тормошҡа ашырылды һәм ҡыҫҡа ваҡыт эсендә завод күпер балкалары, свайҙар һәм тауар бетоны сығарыуға тотондо. “Благовещен МЖБК заводы” продукция һатҡан эре объекттар иҫәбендә – Благовещенда OZON логистика комплексы, Зинин ҡасабаһы районында Өфөнө көньяҡтан урап үткән тимер юлдар аша юл күперҙәре, Өфөлә Рыленко һәм Пугачев урамдары сатында, М-12 “Көнсығыш” трассаһы, шулай уҡ тораҡ пункттарҙы урап үткән юлдар. Географик яҡтан уңайлы булғанлыҡтан, предприятие продукцияһы Түбәнге Новгородҡа, Һамарға, Пермгә, Казанға, Ырымбурға һәм башҡа төбәктәргә күперҙәр һалыуға ла оҙатыла. “Благовещен МЖБК заводы” эшмәкәрлеге күрһәткестәре тотороҡло ыңғай динамика күрһәтә. Был производствоны үҫтерергә, ваҡытында түләүҙе һәм эш хаҡын арттырырға мөмкинлек бирә. Предприятиела 400-ҙән ашыу яңы эш урыны булдырылған. Ә кадрҙар әҙерләү һәм хеҙмәткәрҙәрҙең профессиональ үҫеше өсөн завод Өфө дәүләт нефть техник университеты менән хеҙмәттәшлек тураһында килешеү төҙөнө, Башҡорт архитектура-төҙөлөш колледжы менән дә хеҙмәттәшлек итә. “Благовещен МЖБК заводы” генераль директоры инвестицияларҙың дөйөм күләме 770 миллион һумлыҡ металл изделиелар етештереү тураһында хәбәр итте. – Рәсми рәүештә июль-август айҙарында сафҡа индереләсәк. Сафҡа индерелгәс, айына 85 мең һум эш хаҡына сығырға ниәтләйбеҙ. Тағы ла 570-ләп кеше йыябыҙ, – тип һөйләне Дмитрий Исаев. Башҡортостан Башлығы Радий Хәбиров “Благовещен МЖБК заводы” коллективына һөҙөмтәле эшләгәндәре өсөн рәхмәт әйтте. – 2020 йылда заводтың табышы 4,5 миллион һум, ә 2023 йылда 2 миллиард һум самаһы тәшкил итте. Предприятиеның бик йылдам үҫеше! Был - тиҙ арала төҙөлөштөң, продукцияны һатыу фазаһына инеүҙең һәм ошондай ҙур уңыштарға өлгәшеүҙең күрһәткесе, - тип йомғаҡ яһаны Радий Хәбиров. - Республика предприятиелары етәкселәре өсөн яҡшы өлгө. Эшегеҙ өсөн рәхмәт! Фото: Башҡортостан Башлығы сайты.