Бөгөн Хөкүмәттең аҙналыҡ кәңәшмәһендә коммуналь инфраструктураның торошо тураһында һөйләшеү булды. Доклад менән торлаҡ-коммуналь хужалыҡ министры Ирина Голованова сығыш яһаны. Уның белдереүенсә, 2024 йылда Башҡортостан коммуналь инфраструктураны яңыртыуға 10 миллиард һумдан ашыу федераль аҡса йәлеп иткән. Дөйөм алғанда, Башҡортостандың коммуналь комплексында 1,5 меңдән ашыу ҡаҙанлыҡ, 4 мең километр йылылыҡ тәьминәте селтәре, 517 үҙәк йылылыҡ пункты, 420 һыу алыу ҡоролмаһы, 16 мең километр һыу тәьминәте селтәре, 77 таҙартыу ҡоролмаһы һәм 4 мең километр самаһы канализация селтәре бар. Башҡортостанда был инфраструктураның туҙыуы 54 процент тәшкил иткән. Шул уҡ ваҡытта ил буйынса уртаса күрһәткес 60 процент. Министр әйтеүенсә, республика торлаҡ-коммуналь хужалыҡ объекттарын һәм инженер селтәрҙәрен яңыртыу өсөн федераль аҡса йәлеп итеүҙә әүҙем эшләй. Милли именлек фонды аҡсаһы иҫәбенә былтыр һигеҙ проект тормошҡа ашырылған. Уларға Ҡалтасы, Архангел һәм Күгәрсен райондарында объекттарҙы фатирлап йылытыу системаһына күсеү, Красноусол, Раевка, Ҡыҙылъяр, Павловка ауылдарында һәм Белорет ҡалаһында йылы менән тәьмин итеү сығанаҡтарын төҙөкләндереү, Үрге Тәтешлелә һыу менән тәьмин итеү системаһын төҙөү инә. Быйыл федераль аҡса иҫәбенә Учалыла ҡаҙанлыҡ төҙөләсәк, Ҡалтасы районындағыһы төҙөкләндереләсәк. Шулай уҡ ҙур ҡалаларҙа һәм ауылдарҙа һыу менән тәьмин итеү селтәрҙәре капиталь ремонтланасаҡ, таҙартыу ҡоролмалары яңыртыласаҡ. “Таҙа һыу” федераль проекты сиктәрендә 2023 йылда Благовещенда, Әлшәй, Асҡын, Иглин, Краснокама, Күгәрсен, Өфө, Хәйбулла райондарында һигеҙ һыу менән тәьмин итеү объекты төҙөлгән. Шул арҡала үҙәкләштерелгән һыу тәьминәте системаһынан сифатлы эсәр һыу менән тәьмин ителгән Башҡортостан халҡы өлөшөн 89,7 процентҡа тиклем арттырыуға өлгәшелде. 2024 йылда Бөрөлә, Туймазыла, Өфөнөң Башҡортостан сәскәләре ҡасабаһында, Шишмә, Үрге Ҡыйғы һәм Кушнаренко район үҙәктәрендә һыу алыу ҡоролмалары, эсәр һыуҙы һәм һыу үткәргестәрҙе таҙартыу станциялары төҙөлә. Бынан тыш, ресурстар менән тәьмин иткән 46 ойошма йылылыҡ, һыу менән тәьмин итеү һәм һыу бүлеү өлкәһендә инвестиция программаларын бойомға ашыра. Радий Хәбиров Торлаҡ-коммуналь хужалыҡ министрлығына коммуналь инфраструктураны яңыртыуға федераль аҡса йәлеп итеү эшен дауам итергә ҡушты. Фото: Башҡортостан Башлығы сайты.