Премьер-министр Андрей Назаров етәкселегендәге Башҡортостан Хөкүмәте ултырышында ауыл хужалығы тәғәйенләнешендәге ерҙәрҙе мелиорациялау буйынса проекттарға ярҙам күрһәтеү тәртибе ҡаралды. – Владимир Путиндың Федераль Йыйылышҡа мөрәжәғәтнамәһендә билдәләнгән бурыстарҙың береһе 2030 йылға тиклем ауыл хужалығы продукцияһы етештереү күләменең артыуы менән бәйле, - тип билдәләне Андрей Назаров. - Уны ауыл хужалығы тәғәйенләнешендәге файҙаланылмаған ерҙәрҙе тейешле әҙерләү һәм файҙаланыу иҫәбенә хәл итергә мөмкин. 2023 йылда Рәсәй Хөкүмәте ауыл хужалығы тәғәйенләнешендәге ерҙәрҙе әйләнешкә һөҙөмтәле йәлеп итеү һәм мелиорация комплексын үҫтереү дәүләт программаһына үҙгәрештәр индерҙе, тип һыҙыҡ өҫтөнә алды Премьер-министр. Дәүләт ярҙамы алыусылар исемлеге лә киңәйтелгән. Хәҙер уны селекция һәм орлоҡсолоҡ, ерҙәрҙе мелиорациялау һәм тупраҡтың уңдырышлығын арттырыу өлкәһендә тикшеренеүҙәр үткәргән фәнни һәм мәғариф ойошмалары файҙалана ала. - Башҡортостан был программала әүҙем ҡатнаша. Ағымдағы йылда төбәккә 24,9 миллион һум күләмендә субсидия ҡаралған. Шул уҡ ваҡытта уның 21 миллион һум самаһы федераль бюджеттан килә, – тип билдәләне Министрҙар Кабинеты башлығы. 2018 йылдан алып республикала ауыл хужалығы тәғәйенләнешендәге ерҙәрҙе әйләнешкә һөҙөмтәле йәлеп итеү һәм мелиорация комплексын үҫтереү федераль программаһы сиктәрендә 26 проект тормошҡа ашырылған. Был хаҡта республика Хөкүмәте вице-премьеры – ауыл хужалығы министры Илшат Фәзрахманов белдерҙе. – 2024 йылға Рәсәй Ауыл хужалығы министрлығының конкурс нигеҙендә һайлау йомғаҡтары буйынса республика өсөн 4 проект буйынса сығымдарҙың 50 процентын компенсациялауға 20,9 миллион һум субсидия бүленгән, – тип һыҙыҡ өҫтөнә алды төбәк аграр ведомствоһы башлығы. Федераль кимәлдә ҡабул ителгән үҙгәрештәргә ярашлы, ауыл хужалығы тәғәйенләнешендәге ерҙәрҙе мелиорациялау буйынса сығымдарҙың бер өлөшөн ҡаплауға субсидиялар биреү тәртибенә үҙгәрештәр индереү буйынса төбәк проекттары әҙерләнгән. Мәҫәлән, субсидия алыусыларҙы һайлап алыу «Электрон бюджет» дәүләт интеграцияланған мәғлүмәт системаһында, субсидия алыусыларға ҡуйылған өҫтәмә талаптарҙы иҫәпкә алып, үткәрелергә тейеш. Андрей Назаров республика Хөкүмәте ҡарарының тикшерелгән проектын хупларға тәҡдим итте. Шулай уҡ ул Ауыл хужалығы министрлығына федераль дәүләт ярҙамы сараларын ваҡытында үҙләштереүҙе һәм программаның маҡсатлы индикаторҙарын үтәүҙе тәьмин итергә ҡушты. Был сара хаҡында Андрей Назаров социаль селтәрҙәге шәхси сәхифәһендә лә бүлеште. Фото: pravitelstvorb.ru