Рәсәй Федерацияһы Президентын һайлау көндәрендә Башҡортостанда һайлау процесының үтәлешен күҙәткән халыҡ-ара күҙәтеүселәр республика биләмәһендә тауыш биреү барышы тураһында үҙ фекере менән уртаҡлашты. Сит ил дәүләттәре вәкилдәре менән әңгәмә Өфөләге “Рәсәй Президентын һайлау-2024” йәмәғәт матбуғат үҙәгендә үтте. Хәтерегеҙгә төшөрәбеҙ, республикала һайлау процесын Австриянан, Шри-Ланканан, Никарагуанан һәм донъяның башҡа илдәренән 10 халыҡ-ара күҙәтеүсе күҙәтә. Ҡаҙағстандан килгән күҙәтеүсе Сабила Мостафина һүҙҙәренсә, уны барлыҡ булған участкаларҙа эшлекле, шул уҡ ваҡытта тыныс һәм йылы шарттар хайран ҡалдырған. “Ике көн эсендә Өфө һәм Нуриман райондарында, Дим биҫтәһендә һәм Благовещенда булдыҡ. Беҙгә Успенское Изге Георгий ир-егеттәр монастырында тауыш биреү барышын күҙәтеү мөмкинлеге булды, унда 15 дин әһеле гражданлыҡ бурысын үтәне”, - тине ул. Молдова парламенты депутаты һәм урындағы социалистар партияһы ағзаһы Иванна Кёксал 12 участка һайлау комиссияларында булғаны һәм бер ниндәй иҫкәрмәләр һәм хоҡуҡ боҙоуҙар тапмауын әйтте. – Бөтә участкалар ҙа профессиональ, юғары кимәлдә әҙерләнгән. Һайлаусыларҙы асыҡ йөҙ менән ҡабул итәләр. Билдәле бер ерҙә автоматик рәүештә тауыш иҫәпләнгән урналар бар, бөтә ерҙә насар күргән һайлаусылар хаҡында хәстәрлек күрәләр, ҙурайтыусы лупалар бирелгән. Йәштәр бик күп, кешеләр ағымы тәүлек ваҡытына ҡарамаҫтан өҙлөкһөҙ килә. Тәүге тапҡыр тауыш биргәндәрҙе алҡыштар менән ҡаршы алалар һәм уларға ҙур булмаған бүләк тапшыралар, оло йәштәге һайлаусыларға ла иғтибар бүленә. Ишембайҙа участка һайлау комиссияһында милли көйҙәрҙе башҡарған ҡурайсылар ҡыуандырҙы, Өфө филармонияһында музыкаль педагогтар килгәндәрҙе йырҙар менән ҡаршы алды, был илһамландыра”, – тине ул. Башҡортостанда эшләү дәүерендә Индонезияның Rakyat Merdeka Daily яңылыҡтар агентлығы баш башҡарма мөхәррире Картика Сари башҡорт телен бер аҙ өйрәнгән. – Мин “Рәхмәт”, “Һау булығыҙ” һәм башҡа һүҙҙәрҙе әйтә алам. Ғөмүмән, бындай эшмәкәрлек минең өсөн яңы – бығаса сит илдәргә журналист булараҡ ҡына йөрөй торғайным. Беҙ Өфөлә, Ишембайҙа һәм Ишембай районында ун участка һайлау комиссияһында булдыҡ. Бик ҡыҙыҡлы, тулҡынландырғыс тәжрибә булды. Республикала һайлау процесы законға һәм регламенттарға ярашлы бара, беҙ бер ниндәй ҙә закон боҙоу йәки кире эш итергә маташыу осраҡтарын асыҡламаныҡ. Оло йәштәге ирҙе осраттыҡ, ул йәшенә һәм өйҙә тауыш биреү мөмкинлегенә ҡарамаҫтан гражданлыҡ бурысын үтәргә тип үҙе килгән. Индонезиялағы мәғлүмәт порталыбыҙ уның менән интервью баҫтырып сығарған да инде. Ә Ишембай районында майҙанда бер үк ваҡытта халыҡ байрамдары – Масленица үтте. Мин урындағы бейеүҙәрҙе өйрәндем”, – тип уртаҡлашты ул. Фото: Динар Кәлимуллин.