Башҡортостанда тауыш биреүҙең өсөнсө көнө дауам итә. Өфөләге “Рәсәй Президентын һайлау-2024” йәмәғәт матбуғат үҙәге шулай уҡ бөгөн таң менән асылды һәм эш башланды. Тәүгеләрҙән булып журналистар менән һайлауҙы ойоштороу буйынса колл-үҙәк өсөн яуаплы Анна Сучкова аралашты. Ул алдағы ике көндәге мөрәжәғәттәр тураһында һөйләне. Дөйөм алғанда, ике көн дауамында колл-үҙәк 50 мөрәжәғәт ҡабул иткән. Башлыса техник һорауҙар килә, кешеләр үҙҙәренең һайлау участкаһының адресы, эш ваҡытын белешә, өйҙән тауыш биреү өсөн комиссия ағзаларын саҡыра. Етди тәртип боҙоуҙар теркәлмәгән. – Былтыр сентябрь һайлауында көн дауамында 98 мөрәжәғәт килгән ине, быйыл ике көндә - 50. Был халыҡтың күберәк мәғлүмәтле булыуы тураһында һөйләй. Башлыса Өфөнән шылтыраталар, райондарҙан һирәгерәк. Мөрәжәғәттәр бөгөн дә көн дауамында киске 9-ға тиклем ҡабул ителәсәк, – тине ул. Өлкәндәр өйҙән тауыш биреү теләге менән шылтырата, уларҙың мөрәжәғәттәре участка һайлау комиссияларына тапшырыла. Шулай уҡ, пропискаһы булмаған, ләкин тауыш бирергә теләк белдергән кеше шылтыратҡан. Ундайҙарға Өфө ҡалаһы, Октябрь революцияһы, 75-се йорт адресы буйынса урынлашҡан 119-сы һайлау участкаһына барырға тәҡдим итәләр. Үҙең менән иҫәптән төшөрөлгән булыу тураһындағы билдә менән паспорт алыр кәрәк. Райондан бер кеше шылтыратып “Рәхмәт” акцияһы буйынса мөрәжәғәт иткән, участкала билеттар бөткән булған. Был мәсьәлә лә ваҡытында хәл ителгән. – Эш бөгөн дә дауам итә. Һәр һорауға ла яуап бирергә, кешеләргә ярҙам итергә әҙербеҙ. Өсөнсө көн дә тыныс үтер, барыһы ла яҡшы булыр тип ышанабыҙ, – тине Анна Сучкова. Автор фотоһы.