Әҙәм балаһы, ураҙа тотоп, Аллаһ Тәғәләнең хаҡ юлына аяҡ баҫа, тыйылған ғәмәлдәрҙән ситләшә. Мәҫәлән, дөрөҫ булмаған һүҙ әйтеүҙән, яңылыш фекер йөрөтөүҙән. Пәйғәмбәребеҙ Мөхәммәт ғәләйһис-сәләм мөбәрәк хәҙисендә: "Кем дә кем ураҙа тотоп та, хаҡһыҙлыҡтан, ялғанлыҡтан айырылмаһа, Аллаһ Тәғәлә уның ас йөрөүенә мохтаж түгел", — тигән. Һәр нәмәне уйлап әйтеү мөһим. "Мосолмандың ике күркәм сифаты бар: мәғәнәле, аңлайышлы, кешенең күңелен ҡырмаҫлыҡ итеп һөйләр, ә инде кемдер һүҙ тота икән, уны матур итеп тыңлай белер", — тигән Пәйғәмбәребеҙ. Ҡыҙғанысҡа ҡаршы, ураҙа айында асығып ҡына сауап йыйырға теләгәндәр барлығы хаҡында ишетергә мөмкин. Улар тыйылған мәлдә ашамай-эсмәй, әммә башҡа йәһәттән холоҡ-фиғелдәре элеккесә ҡала. Мәҫәлән, башҡалар менән мөнәсәбәте ҡырҡыу булыуы, алдашыуы, бүтәндәргә ихтирам-хөрмәт күрһәтмәүе ихтимал. Был, әлбиттә, ураҙаның ҡағиҙәләрен үтәмәү тигән һүҙ. Шул уҡ ваҡытта мәрхәмәтле динебеҙҙә асығып ҡына сауап алырға тырышҡандарға ла ышаныс белдерелә. Йәғни был әҙәм балаһы ошондай юл менән дингә тәүге аҙымын яһай. Ураҙа тотоу бит – ҙур мәктәп. Асыҡҡан ваҡытта кешенең күңеленә шәфҡәт, мәрхәмәт инә, ул ашау-эсеүҙән мәхрүм сирлеләрҙең, мохтаждарҙың, ярлыларҙың хәлен аңлай башлай. Ниҙелер үҙең кисермәйенсә, бүтәндәрҙе төшөнөү ауыр бит. Алда әйтелгәнсә, ураҙала әҙәм балаһы телен тәрбиәләргә, уйлап һөйләргә тейеш. Был үтә мөһим. Тел тормошта ҙур көскә эйә. Уның ерҙә үҙ урыныңды табыуҙа, башҡалар менән мөнәсәбәт ҡороуҙа әһәмиәте баһалап бөткөһөҙ. Пәйғәмбәребеҙҙең "Мосолман башҡаларға ҡулы менән дә, теле аша ла зарар килтермәҫ" тигән һүҙҙәрен онотмайыҡ. Аллаһ Тәғәлә барыбыҙҙың да ураҙаларын ҡабул итһен, иншаллаһ. Иртәгәгә, 17 мартҡа, сәхәр, ифтар, намаҙ ваҡыттарын тәҡдим итәбеҙ (Башҡортостан мосолмандары Диниә назаратынан алынды, Өфө ваҡыты буйынса төҙөлгән). Фото: Башҡортостан мосолмандары Диниә назараты сайты.