Երբ ես նոր էի ծնվել մինչև խորեոգրաֆիկ ուսումնարան ընդունվելը այդ տարիներին մեր տունը,հայրիկիս` արտիստ Էդվարդ Մուրադյանի մոտ այցելության է եկել,շատ անգամներ, հանճարեղ արտիստ Վահրամ Փափազյանը և իմ մայրս` պարուհի Հայկանուշ Ասատրյանը մեծ հարգանքով ու հյուրասիրությամբ ընդունել է նրան։Ես այդ այցելությունները չեմ հիշում,շատ փոքրիկ եմ եղել,բայց հետագայում ծնողներս շատ են պատմել ինձ նրա մասին։
Երևանում 1960-ական թվականների վերջին,մի անգամ, ամառային մի օր, գնում էի օպերայի և բալետի թատրոնից դեպի տուն։Այդ օրը իմ հետ էր աղջիկս` Գոհար Մսրյանը։
Կիևյան փողոցում մտանք խանութ,մի քանի րոպե անց դուրս եկանք և շարունակեցինք ճանապարհը դեպի կանգառ,այդ պահին տեսա, որ դեպի մեզ է գալիս դանդաղ քայլերով արտիստ Վահրամ Փափազյանը։Ես ակամայից ժպտացի նրան,նա էլ տեսնելով իմ ժպիտը հետաքրքրությամբ նայեց ինձ կանգնելով։Ես տեսնելով, որ Փափազյանը կանգնեց ասացի նրան.
- Բարև Ձեզ,ես Իվետտան եմ,դերասան Էդվարդ Մուրադյանի աղջիկն եմ,իմ հայրը շատ է պատմել Ձեր մասին,երևի կհիշեք իրեն։
Փափազյանը երբ լսեց հայրիկիս անուն ազգանունը, միանգամից ժպտաց և ասաց.
- Ինչպես չեմ հիշում,և շարունակեց,–դուն Եդվարդին աղջիկն ե՞ս։
Հանճարեղ արտիստը կյանքում խոսում էր արևմտահայերեն և այդ պատճառով հայրիկիս անվանում էր ոչ թե Էդվարդ այլ Եդվարդ:
Հետո ժպտալով ասաց.
- Իմ կողմեն Եդվարդին բարևեք։
Տեսնելով աղջկաս` Գոհարին,ասաց.
- Սա ձեր աղջիկն է՞։
Ես նայելով Փափազյանին ասացի.
- Այո։
Զրուցեցինք հայրիկիս մասին,հետաքրքրվեց և հիշեց մայրիկիս պատրաստած ճաշերը։ Հետո ես ու աղջիկս` Գոհարը, հաջողություն ասելով գնացինք։
Այսպիսի մի կարճ հանդիպում ունեցա նրա հետ։
Տարիներ անց եղբայրս` գրող Դավիթ Մուրադյանը,տվեց ինձ կարդալու Փափազյանի §Հետադարձ հայացք¦ հիշողությունների գիրքը։
Տարիներ հետո ես կարդացի իմ հայրիկի հուշերը §Օրերի վարագույրը¦ վերնագրով, որտեղ նա պատմում էր իր բազմաթիվ հանդիպումներից մեկի մասին Վահրամ Փափազյանի հետ: Իսկ դրանից առաջ ես այդ հուշերից մի հատված լսել էի 1970-ական թվականներին, երբ հայրիկիս հրավիրեցին ռադիո և նա ելույթ ունեցավ:
Վահրամ Փափազանը մտերիմ էր նաև հորեղբորս՝ բալետի արտիստ, բալետմեյստեր Զարէ Մուրադյանի հետ, երբ ես փոքր եմ եղել Փափազանը իր ֆոտոն մակագրել է հորեղբորս և նվիրել նրան:
Անցան շատ տարիներ այդ հանդիպումից հետո։Ինձ,իմ ամուսնուս` օպերային երգիչ Ավետիս Մսրյանին,հորեղբորս`բալետի արտիստ Զարէ Մուրադյանին հրավիրեցին նկարահանվելու §ՀայՖիլմ¦-ում §Մսյո Ժակը և ուրիշները¦ գեղարվեստական ֆիլմում։
Այդ ֆիլմում նկարահանվում էր նաև Վահրամ Փափազյանը։ Ընդմիջմանը,նկարահանման տաղավարում նստած էինք և զրուցում։
Հրավիրված էր լուսանկարիչ,որը մեզ բոլորիս նկարեց,իսկ մի որոշ ժամանակ անց ստացա այդ լուսանկարը։
Ահա այդ լուսանկարը` Վահրամ Փափազյանը նստած է բազկաթոռին։
Այսպիսի երկու հանդիպումներ ունեցա Վահրամ Փափազյանի հետ։
Երևան
2023 թիվ հուլիս
