Райондарҙа һайлау нисек бара?

Өфөләге “Рәсәй Президентын һайлау-2024” йәмәғәт матбуғат һайлау үҙәге менән тура эфирҙа бәйләнешкә әлеге ваҡытта райондарҙа эшләгән күҙәтеүсе-блогерҙар сыҡты. Улар Краснокама районынан Земфира Сәғитова, Мәләүез районынан Аэлита Әхтәмова һәм Кушнаренко районынан Айгөл Вәлиева ине. Земфира Әфнән ҡыҙы - Краснокама районының Ҡуян ауылында башҡорт теле һәм әҙәбиәте уҡытыусыһы. Уның әйтеүенсә, районда төрлө милләт кешеләре йәшәй, һәр кем үҙенең тыуған телен өйрәнә, шул уҡ ваҡытта дәүләт теле булараҡ башҡорт телен бөтәһе лә уҡый. – Һайлауҙың икенсе көнө шулай уҡ тыныс үтә, ығы-зығы юҡ. Кешеләр бик ихлас киләләр, ғаиләләре менән тауыш биреүселәр бихисап. Минең мәғлүмәттәр буйынса, әле һайлаусыларҙың яртыһынан күбеһе килде лә инде. Кешеләр “Рәхмәт” акцияһында ихлас ҡатнаша, беренсе тапҡыр килгәндәргә һәм өлкән йәштәге һайлаусыларға бүләктәр бар. Дөйөм алғанда, беҙҙә барыһы ла тыныс бара, – тине ул. Мәләүездә лә тауыш биреү процессы тыныс һәм ойошҡан үтә. – Быйыл шуға иғтибар иттем, ғаиләләре менән килгәндәр күп, милли кейемдәрен кейеп килгәндәр бик матур тәьҫораттар ҡалдыра. Өлкән йәштәге кешеләр үҙҙәре килә алмаһа, комиссия ағзалары өйҙәренә бара. Өлкән һайлаусыларҙың береһенә 90 йәш ине, ул да бурысын үтәне. Кешеләр "Рәхмәт" акцияһында ҡатнаша, – тине ул. Кушнаренко районынан “Авангард” гәзите хәбәрсеһе Айгөл Вәлиева үҙенең районында һайлау барышы тураһында мәғлүмәт бирҙе. – Районда 46 һайлау участкаһы эшләй, 21634 һайлаусы теркәлгән. 132 кеше беренсе тапҡыр тауыш бирергә килде, шулай уҡ алты кеше 100 йәште үткән. Йөҙйәшәрҙәр ҙә үҙ бурысын үтәргә теләк белдерҙе, улар өйҙәрендә һайланы. Ә 85-90 йәшлек инәй-бабайҙар үҙҙәре килә һайлау участкаларына, улар өсөн тауыш биреү электән байрам кеүек ҡабул ителә. Шулай уҡ ялға ҡайтҡан махсус хәрби операция яугирҙәре килә. Улар ҙа ғаиләләре менән бергә килде, ихлас итеп ауылдаштары менән аралашалар, хәл белешәләр. Беҙҙең яҡта һайлау бик ойошҡан, тәртип боҙоуһыҙ үтә, – тине Айгөл Вәлиева. Автор фотоһы.