Табиптар гипертонияны дауалауҙа яңы йүнәлештәр менән танышҡан. Уҡытыуҙы Башҡорт дәүләт медицина университетының 1-се госпиталь терапияһы кафедраһы доценты, табип-кардиолог, медицина фәндәре кандидаты Зөлфиә Рөстәмова алып барған. Шулай уҡ дауахананың Инсульт мониторингы үҙәге белгестәре Дүртөйлө ҡалаһының беренсел ҡан тамырҙары бүлексәһенә ойоштороу-методик ярҙам күрһәткән. Семинарҙы 1-се Төбәк ҡан тамырҙары үҙәге етәксеһе Эмма Колчина, нур диагностикаһы бүлеге мөдире Юлиә Минсафина, ойоштороу-методика бүлеге мөдире Гүзәл Ғилемшина үткәргән. Улар инсульт ваҡытында медицина ярҙамы күрһәтеүҙең заманса стратегиялары хаҡында һөйләгән , инсультты нур менән диагностикалау буйынса оҫталыҡ дәресе үткәргән, Өфө ҡалаһының ашығыс медицина ярҙамы клиник дауаханаһының төбәк ҡан тамырҙары үҙәгендә ҡан тамырҙары ауырыуҙарын диагностикалауҙы һәм дауалауҙы ойоштороу тәжрибәһе менән уртаҡлашҡан. Мәғлүм булыуынса, Өфөлә Ашығыс ярҙам дауаханаһы базаһында 1-се Төбәк ҡан тамырҙары үҙәге урынлашҡан, һәм учреждение белгестәренең был ауырыуҙарға ҡаршы көрәштә тәжрибәһе ҙур. Рәсәйҙә һуңғы йылдарҙа йөрәк-ҡан тамырҙары ауырыуҙарына ҡаршы көрәш системаһы етди яңыртыла. “май" указдары нигеҙендә Рәсәй Президенты тәҡдим иткән “Һаулыҡ һаҡлау” милли проекты (национальный проект “Здравоохранение”) буйынса, илдә 140 ҡан тамырҙары үҙәге һәм 469 беренсел ҡан тамырҙары бүлексәһе заманса медицина ҡорамалдары менән йыһазландырыласаҡ. Тәмәке, алкоголь ҡулланыуҙы кәметеү, дөрөҫ туҡланыу, физик әүҙемлек, йөрәк-ҡан тамырҙары ауырыуҙары ваҡытында беренсе ярҙам тураһында мәғлүмәт таратыу инфаркттарҙы һәм инсульттарҙы иҫкәртеүгә йүнәлтелгән. Милли проектты тормошҡа ашырыу һөҙөмтәһендә ошо һәм башҡа төрлө ҡан тамырҙары сирҙәренән үлем осраҡтары дүрттән бер өлөшкә тиерлек кәметелергә тейеш. Беҙҙең республикала был йүнәлешкә ҙур иғтибар бүленә. Тап ошо милли проект нигеҙендә Башҡортостанда медицина учреждениеларының матди-техник базаһын яҡшыртыуға, халыҡты медицина хеҙмәтләндереүенә йүнәлтелгән байтаҡ пландар һәм проекттар тормошҡа ашырыла. Фото: бсмп-уфа.рф