Өфөлә эшләгән “Рәсәй Президентын һайлау-2024” йәмәғәт матбуғат үҙәгендә сираттағы ҡунаҡ – Башҡортостан Һаулыҡ һаҡлау министрлығының ғәҙәттән тыш хәлдәрҙә мобилизация әҙерлеге һәм медицина ярҙамын ойоштороу бүлеге начальнигы вазифаһын башҡарыусы Эльвира Хубетова республика биләмәһендә пациенттары 15 марттан 17-нә тиклем Президент һайлауында тауыш бирә алған һаулыҡ һаҡлау учреждениелары менән таныштырҙы. – Республикала Һаулыҡ һаҡлау министрлығына ҡараған 135 медицина учреждениеһы бар. Уларҙың 38-е базаһында 67 участка һайлау комиссияһы эшләй, шуларҙың 55-е даими нигеҙҙә, улар поликлиникаларҙа, фельдшер-акушерлыҡ пункттарында, амбулаторияларҙа һәм профилле белем биреү учреждениеларында урынлашҡан. Ваҡытлыса һайлау комиссиялары туранан-тура дауаханаларҙа эшләй, улар 12, – тине Эльвира Хубетова. Ул медицина ойошмаларының стационар дауалауҙа һәр пациентҡа үҙенең гражданлыҡ позицияһын белдереү мөмкинлеге биреүен һыҙыҡ өҫтөнә алды. “Дауаханаларҙа дежур медицина персоналы һәм пациенттар өсөн һайлау комиссияларының ваҡытлыса участкалары эшләй. Түшәктә ятып тороусылар өсөн күсмә йәшниктәр ҡаралған, ә һайлау комиссиялары булмаған медицина ойошмаларында баш табиптар алдан уҡ пациенттарҙы ҡарау өсөн халыҡ исемлеген тапшырған”, — тип аңлатты Эльвира Хубетова. Иғтибар: республикала Рәсәй Үҙәк һайлау комиссияһының мәғлүмәт-белешмә үҙәгенең төбәк бәйләнеш үҙәге эшләй. Һайлау участкаһы адресын асыҡлау һәм башҡа һорауҙар буйынса 8-800-200-00-20 телефонына бушлай шылтырата алаһығыҙ. Шылтыратыуҙар 14 марттан 18 мартҡа тиклем тәүлек әйләнәһенә ҡабул ителә. Александр Данилов фотоһы. #ВыбираемПрезидента #Башкортостан #БашВыбор2024