Өфө фән һәм технологиялар университетының Хоҡуҡ институты директоры Руслан Зәйнуллин һайлау процесы барышында ҡотҡоға бирелеүселәр һәм хоҡуҡ боҙоуға юл ҡуйғандар өсөн мөмкин булған хәүефте баһаланы. Ул “Башинформ” агентлығына хәбәр итеүенсә, бындай ғәмәлдәр өсөн хоҡуҡ боҙоусыларға етди яуаплылыҡ янай, сөнки граждандарҙың һайлау хоҡуҡтары Рәсәй ҡануниәте яҡлауы аҫтында. – Илебеҙ һәм беҙҙең өсөн һәр саҡ мөһим булған, Рәсәйҙең киләсәге тураһында ҡарарҙар ҡабул иткән көндәрҙә, беҙҙең дошмандарыбыҙ провокациялар ойоштора. Был граждандарҙың һайлау хоҡуҡтарын тормошҡа ашырыуға ҡамасаулауҙың төрлө формаларына йәки һайлау комиссияларының эшенә – һайлау урналарын аңлы рәүештә боҙоу, һайлау участкаларын яндырырға маташыу һәм беҙҙең һайлау системаһын дискредитациялауҙың башҡа формаларына ҡағыла. Һәр кем был провокацияларҙың РФ Енәйәт кодексының 141-се статьяһында ҡаралған енәйәт тип квалификацияланған енәйәт эше булыуын аңларға тейеш. Граждандарҙың һайлау хоҡуҡтарын енәйәт-хоҡуҡи яҡлау бындай ғәмәлдәр өсөн штраф, мотлаҡ эштәр йәки бер йылға тиклем холоҡ төҙәтеү эштәре рәүешендә енәйәт яуаплылығын күҙ уңында тота. Бынан тыш, әгәр кешенең ғәмәлдәрендә тикшерелгән енәйәттең квалификациялы билдәләре булһа, енәйәт яуаплылығы биш йылға тиклем иркенән мәхрүм итеү рәүешендә иң ауыр язаны ла күҙ уңында тота ала. Бөтә граждандарыбыҙҙы ла һаҡ булырға, провокацияларға бирелмәҫкә һәм язаның ҡотолғоһоҙлоғоноң енәйәт-хоҡуҡи принцибын иҫтә тотоп, бөтә ҡылыҡтарыбыҙҙы айыҡ баһаларға саҡырам, – тип иҫкәртте Руслан Зәйнуллин. Фото: Руслан Зайнуллин #ВыбираемПрезидента #Башкортостан #БашВыбор2024