Һуңғы ваҡытта күптәр иртән торғас та йылы, хатта эҫерәк һыу эсергә ғәҙәтләнеп китте. Төрлө дауалаусы бәлзәмдәрҙең шунһыҙ файҙаһы юҡ, тигәнде ишетергә тура килә. Мин үҙем дә элек бүлмә температураһындағы һыуҙы эсһәм, хәҙер ҡайнарыраҡты хуп күрәм, сөнки шулай организмдың уянғанын һиҙәм. Японияла һәм Һиндостанда иртән йылы һыу эсеү оҙон ғүмерлелектең бер сере һанала. Кәйефте күтәрә, хәлде яҡшырта, тышҡы ҡиәфәтте тәртипкә килтерә. Ул, ысынлап та, ярҙам итәме, ашҡаҙан-эсәк юлы, йөрәк-ҡан тамырҙары һәм башҡа ауырыуҙарҙы иҫкәртәме? Мәскәү табибы Алексей Воротников иртән йылы һыу эсеүҙең файҙалы икәнлеген билдәләй. Шыйыҡлыҡ 40-50 градус йылылыҡта булырға тейеш. Ас килеш йылы һыу эсеүҙең файҙаһы: Организмды уятыусы көс булараҡ, метаболизмды яҡшырта. Йәғни матдәләр алмашыныуын тиҙләтә. Ярты сәғәт эсендә процестың тиҙлеге 20-30 процентҡа арта. Ашҡаҙан-эсәк юлы эшмәкәрлеген яйға һала. Йылы һыу ашҡаҙан ферменттарын барлыҡҡа килтереп, аш эшкәртеү процесын яйға һала, кислота кимәлен түбәнәйтә. Шуға күрә гастрит йә ашҡаҙан сей яраһы диагнозы ҡуйылған кешегә даими рәүештә бер стакан эҫерәк шыйыҡлыҡ эсергә кәрәк. Эс ҡатыуҙы иҫкәртә. Шыйыҡлыҡ эсәктәрҙе “уята”, улар һәйбәтерәк эшләй башлай, кистән артыҡ ашағанды еңеләйтә. Организмдың хәл-торошон яҡшырта, энергияны арттыра. Ҡан тамырҙары, лимфалар, һейҙек ҡыуығы эшмәкәрлегенә лә файҙа. Ниңә тап йылы һыумы? Гастроэнтерологтар һәм диетологтар әйтеүенсә, ас ҡарынға ныҡ һыуыҡ һәм ныҡ эҫе һыуҙы эсеү хупланмай. Бындай температуралағы шыйыҡса ашҡаҙанды яндыра, ашҡаҙан-эсәк юлы моторикаһын боҙа. Ашҡаҙан аҫтындағы бөйөрҙәргә һыуыҡ ярамай, насар эшләй, ҡан ҡуйыра. Ә бына 21 - 35 градустағы йылы һыу - идеаль вариант. Ныҡ файҙаһы тейһен тиһәгеҙ, һыуҙы уянғас та эсергә, унан һуң иртәнге ашҡа тиклем 30-40 минут үтергә тейеш. Һыуҙы сәй, һөт, һут йәки башҡа эсемлек менән алмаштырмаҫҡа. Тик йылы көйө эсергә. Тәме оҡшамай икән, уға әҙерәк бал йәки лимон ҡушырға була. Автор фотоһы.