Баймаҡ районының Сыңғыҙ ауылы мәктәбе төркөмөнән хәбәр итеүҙәренсә, уҡыусылар МХО-нан ваҡытлыса ялға ҡайтҡан табибә Алһыу Ғибат ҡыҙы менән осрашҡан. "Сыңғыҙ мәктәбендә ауылдашыбыҙ, хәрби хәрәкәт ветерандарының төбәк ойошмаһы етәксеһе, Башҡортостан Республикаһының йәмғиәт палатаһы ағзаһы Тимерйән Рәжәп улы Рәжәпов һәм Буранбай ауылының оло йөрәкле, ҡыйыу ҡыҙҙарының береһе, ваҡытлыса ялға ҡайтҡан Алһыу Ғибат ҡыҙы менән осрашыу үтте. Ҡунаҡтарыбыҙҙың сығышын тыңлағандан һуң, уҡыусылар һорауҙар бирҙе. Филиал етәксеһе Рәйлә Базарбай ҡыҙы осрашыуҙы бик йәнле итеп алып барҙы. Бындай осрашыуҙарҙың уҡыусыларҙа Тыуған илебеҙгә ҡарата һөйөү тәрбиләүҙә әһәмиәтлелеген билдәләп үтте. Арҙаҡлы композиторыбыҙ Хөсәйен Әхмәтов музейына экскурсия, иҫтәлеккә фото төшөү һәм сәй табыны ҡунаҡтарыбыҙҙың күңеленә хуш килгәндер. Шулай уҡ ауылдашыбыҙ балалар баҡсаһы тәрбиәләнеүселәрен бүләк-уйынсыҡтар менән ҡыуандырҙы. Сарала ҡатнашҡан Таулыҡай ауыл хакимиәте башлығы Ҡәйүм Рәжәп улы махсус хәрби операцияла хеҙмәт иткән яҡташтарыбыҙға ылау әҙерләп, кәрәк-яраҡ менән ярҙам иткән ауыл халҡына, ауылдан ситтә йәшәгән яҡташтарға рәхмәт һүҙен еткерҙе. Алдағы көндәрҙә ойоштороласаҡ сараларҙа ла әүҙем ҡатнашырға саҡырҙы. Алһыуҙың: «Тыуған яҡтан алған күстәнәстәр, хаттар, әйберҙәр, йылы ойоҡбаштар, бирсәткәләр беҙҙең аяҡ-ҡулдарыбыҙҙы ғына йылытып ҡалмай, ә йәндәребеҙгә лә шифа, дауа булып ҡала. Беҙ уларҙан үҙебеҙгә көс алабыҙ!” - тигән һүҙҙәрен тыныс күңел менән тыңлап булмай. Һәммәбеҙгә лә һаулыҡ, бәхетле оҙон ғүмер теләйем. Илдә тыныслыҡ урынлашып, ул-ҡыҙҙарыбыҙ иҫән-һау ҡайтып, ҡыуаныста-шатлыҡта осрашырға яҙһын!" - тип хәбәр итәләр. Фото һәм сығанаҡ: "Сыңғыҙ мәктәбе" төркөмөнән.