Бөгөн, 15 мартта, Башҡортостан Башлығы ҡатыны менән бергә Рәсәй Президентын һайлауҙа үҙ тауыштарын бирҙе. Каринэ һәм Радий Хәбировтар Өфөнөң “Башҡортостан” дәүләт концерт залында урынлашҡан 109-сы һайлау участкаһында һайланы. – Иң мөһиме-халыҡ тауыш бирә алһын өсөн уңайлы шарттар булдырыу ине. Тауыш биреү өс көн дауам итәсәк. Был һайлау, ысынлап та, хәл иткес. Алдағы алты йылда илебеҙҙең үҫешен билдәләйбеҙ. Шул уҡ курс буласаҡ, алға хәрәкәт буласаҡ. Минеңсә, һайлауға барыһы ла әҙер. Иртәнән үк халыҡ һайлау участкаларына бара. Сәйәси сара лайыҡлы, тейешле кимәлдә үтер, тип уйлайым. Шуны һыҙыҡ өҫтөнә алам: бөтә хеҙмәттәр, бөтә һайлау комиссиялары системаһы уларҙы үткәреүгә әҙер. Беҙ уларҙы яҡшы, йылы шарттарҙа үтербеҙ тип ышанам, – тип белдерҙе Башҡортостан Республикаһы Башлығы Радий Хәбиров. Иҫегеҙгә төшөрәбеҙ, иртәнге сәғәт 8-ҙә 3308 участка һайлау комиссияһы, шул иҫәптән һайлаусыларҙың ваҡытлыса торған урындарында (дауаханалар, СИЗО, шифаханалар, тимер юл вокзалы) ойошторолған комиссиялар ишектәрен асты. Һайлау участкалары урындағы ваҡыт менән 20.00 сәғәткә тиклем эшләйәсәк. Теге йәки был сәбәптәр арҡаһында өйҙән сыға алмаған, әммә һайлауҙа ҡатнашырға теләгән граждандар өсөн өйҙә тауыш биреү ҡаралған. 17 мартта 14.00 сәғәткә тиклем участка һайлау комиссиялары өйҙә, шул иҫәптән телефон аша тауыш биреүҙе һорап мөрәжәғәт ҡабул итә. Авторы: Әлфиә Әғлиуллина Валерий ШАХОВ фотоһы. Мәғлүмәт сығанағы: Башинформ. #ВыбираемПрезидента #Башкортостан #БашВыбор2024